Чүй облусунун Аламүдүн районунун Кара-Жыгач, Чүй районунун Чүй айыл өкмөттөрүнүн башчыларын шайлоону дайындоо жөнүндө

Чүй облусунун Аламүдүн райондук мамлекеттик администрациясынын башчысы–акиминин 2020-жылдын 1-июлундагы № 313-р буйругу менен Кара-Жыгач айыл өкмөтүнүн башчысы Джаманбаев Иса Жузумалиевич каза болгондугуна байланыштуу ээлеген кызматынан бошотулган.

Чүй облусунун Чүй райондук мамлекеттик администрациясынын башчысы–акиминин 2020-жылдын 7-августундагы № 100-р буйругу менен Чүй айыл өкмөтүнүн башчысы Шакеев Жантай Мыктыбекович өзү берген арызынын негизинде ээлеген кызматынан бошотулган.

«Кыргыз Республикасынын шайлоо жана референдум өткөрүү боюнча шайлоо комиссиялары жөнүндө» Кыргыз Республикасынын Мыйзамынын 6, 7, 14, 18-беренелерине, «Жергиликтүү өз алдынча башкаруу жөнүндө» Кыргыз Республикасынын Мыйзамынын 49-беренесине, Кыргыз Республикасынын Шайлоо жана референдум өткөрүү боюнча борбордук комиссиясынын 2017-жылдын 6-январындагы № 3 токтому менен бекитилген «Айыл өкмөтүнүн башчысын шайлоонун тартиби жөнүндө» Жобосуна ылайык, Кыргыз Республикасынын Шайлоо жана референдум өткөрүү боюнча борбордук комиссиясы

ТОКТОМ КЫЛАТ:

1. Чүй облусунун Аламүдүн районунун Кара-Жыгач, Чүй районунун Чүй айыл өкмөттөрүнүн башчыларын шайлоо 2020-жылдын 28-августуна дайындалсын жана саат 09:00дөн 12:00гө чейин өткөрүлсүн.

2. Аламүдүн жана Чүй аймактык шайлоо комиссиялары шайлоону Кыргыз Республикасынын мыйзамдарына ылайык жана Кыргыз Республикасынын өкмөтү тарабынан 2020-жылдын 11-майындагы № 244 токтому менен бекитилген санитардык-эпидемиологиялык эрежелеринин сакталышы менен (1,5-2 метр аралыкты сактоону камсыздоо жана контролдоо, бир жолку бет каптарды колдонуу, дезинфекциялоочу эритмелер, спирт камтылган антисептик менен колдорду тазалоо) өткөрүүнү уюштурсун.

3. Бул токтом «Эркин Тоо» газетасына жана Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.

4. Бул токтомдун аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын төрагасынын орун басары А. Бекматовго жүктөлсүн.

Төрага                                                                                                                      Н. Шайлдабекова

Бишкек ш., 2020-жылдын 12-августу

№ 163