Нурбаев Жалолидин Паязидиновичти № 5 көп мандаттуу шайлоо округу боюнча Кыргыз Республикасынын Жогорку Кеңешинин депутаттыгына талапкер кылып каттоодон баш тартуу жөнүндө

2025-жылдын 13-октябрында Кыргыз Республикасынын Шайлоо жана референдум өткөрүү боюнча борбордук комиссиясына Нурбаев Жалолидин Паязидиновичтен № 5 көп мандаттуу шайлоо округу боюнча Кыргыз Республикасынын Жогорку Кеңешинин депутаттыгына талапкер кылып өзүн-өзү көрсөтүү тартибинде шайлоого катышуу ниети жөнүндө арыз келип түшкөн.

Талапкерлер, саясий партиялар тарабынан берилген шайлоо документтерин кабыл алуу жана текшерүү боюнча жумушчу топ (мындан ары – Жумушчу топ) Нурбаев Жалолидин Паязидиновичтин Кыргыз Республикасынын Жогорку Кеңешинин депутаттыгына талапкерлерге коюлуучу мыйзамдардын талаптарына ылайык келбестигин аныктап, аны талапкер кылып каттоодон баш тартууну сунуштаган.

Кыргыз Республикасынын Ички иштер министрлигинин Маалыматтык технологиялар башкы башкармалыгынын “Түндүк” электрондук ведомстволор аралык өз ара аракеттенүү системасы аркылуу алынган маалыматы (2025-жылдын 24-октябрындагы кириш № 5/345) боюнча 2006-жылдын 6-октябрында Бишкек шаарынын ИИБнын тергөө бөлүмү тарабынан Кыргыз ССРнин Кылмыш-жаза кодексинин (1960-ж. редакциясында) 235-беренесинин 3-бөлүгүндө каралган кылмыштын белгилери боюнча Нурбаев Жалолидин Паязидиновичке карата козголгон № 51-96-688 кылмыш иши Кыргыз Республикасынын Кылмыш-жаза процессуалдык кодексинин 28-беренесинин 1-бөлүгүнүн 11-пунктунун негизинде эскирүү мөөнөтү өтүп кеткендигине байланыштуу кыскартылган, бул кыскартуу үчүн реабилитацияланбаган негиз болуп саналат.

Нурбаев Жалолидин Паязидиновичке карата кылмыш иштери кыскартылгандыгы тууралуу төмөнкү маалыматтар келип түшкөн Ошону менен бирге, Кыргыз ССРнин Кылмыш-жаза кодексинин 7-1-беренесинин 3-бөлүгүнө ылайык, ошол эле кодекстин 235-беренесинин 3-бөлүгүндө көрсөтүлгөн кылмыштар, оор деп эсептелет.

Жумушчу топтун 2025-жылдын 28-октябрында болуп өткөн отурумунда Нурбаев Жалолидин Паязидиновичтин ыйгарым укуктуу өкүлү жана Кыргыз Республикасынын Ички иштер министрлигинин Маалыматтык технологиялар башкы башкармалыгынын кызматкери катышып, сөз сүйлөштү.

Конституциялык мыйзамдын 3-беренесинин 4-бөлүгүнө ылайык Президенттин кызмат ордуна, Жогорку Кеңештин депутаттыгына шайланууга төмөнкү адамдар укуксуз:

1) соттолгондугу бар, анын ичинде алып салынган же жоюлган;

2) аларга карата кылмыш иши реабилитацияланбаган негиздер боюнча кыскартылган, төмөнкүлөрдү кошпогондо:

- коркунучтуулугу аз кылмыштар, этиятсыздыктан жасалган анча оор эмес кылмыштар;

- Кыргыз Республикасынын кылмыш-жаза мыйзамдарына ылайык жана аларда каралган тартипте жабырлануучу жеке-ачык айыптоону колдоодон баш тарткан жана (же) жабырлануучу айыпталуучу менен макулдашууга жетишкен учурлар.

Жумушчу топтун 2025-жылдын 28-октябрындагы № 5 көп мандаттуу шайлоо округу боюнча Нурбаев Жалолидин Паязидиновичти Кыргыз Республикасынын Жогорку Кеңешинин депутаттыгына талапкер кылып каттоодон баш тартуу жөнүндө сунушунун негизинде, “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамынын 3-беренесинин 4-бөлүгүн, 61-беренесинин 11-бөлүгүн жетекчиликке алып, “Кыргыз Республикасынын Шайлоо жана референдум өткөрүү боюнча борбордук комиссиясы жөнүндө” Кыргыз Республикасынын конституциялык Мыйзамынын 3, 4, 8-беренелерине ылайык Кыргыз Республикасынын Шайлоо жана референдум өткөрүү боюнча борбордук комиссиясы чечим кылат:

1. Нурбаев Жалолидин Паязидиновичти № 5 көп мандаттуу шайлоо округу боюнча Кыргыз Республикасынын Жогорку Кеңешинин депутаттыгына талапкер кылып каттоодон баш тартылсын.
2. Бул чечим “Эркин-Тоо” мамлекеттик расмий гезитине жана Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.
3. Бул чечимдин аткарылышын контролдоо Кыргыз Республикасынын Жогорку Кеңешинин депутаттарын шайлоодо талапкерлер, саясий партиялар тарабынан берилген шайлоо документтерин кабыл алуу жана текшерүү боюнча жумушчу топтун жетекчиси А.С. Жупуевага жүктөлсүн.

        Төрага                                                                                                               Т. Шайназаров

Бишкек ш., 28.10.2025-ж

№ 626