Жаңылыктар

Урматтуу кыргызстандыктар! Кыргыз Республикасынын шайлоо жана референдум өткөрүү боюнча борбордук комиссиясы жалпыңыздарды Орозо айт майрамы менен куттуктайт! Бүгүнкү Орозо айт – мусулман бир туугандарыбыз үчүн өзгөчө, маанилүү майрамдардын бири. Ыйык Рамазан айы бизди сабырдуулукка, кайрымдуулукка жана бири-бирибизге боорукер болууга чакырды. Бул айда көптөгөн жакшы иштер жасалып, жүрөктөрүбүз тазарып, ниеттерибиз жаңырды. Жакшы ниетте кармаган орозоңуздар, кылган дуба тилектериңиздер кабыл болсун. Орозо айт ар бир үйгө ынтымак, оомат жана бакыт алып келсин. Айтыңыздар маарек болсун!

Кыргыз Республикасынын Борбордук шайлоо комиссиясы бүгүн, 18-марттагы жыйынында“Ноокат аймактык шайлоо комиссиясынын курамына өзгөртүү киргизүү”жөнүндө токтом кабыл алды. Ноокат аймактык шайлоо комиссиясынын курамынан берген арыздарына ылайык Ажибекова Айчурек Акылбековна (“Ынтымак” саясий партиясынан), Топчубаева Гүлмира Мамановна (“Ишеним” саясий партиясынан) чыгарылды. Комиссиянын курамына резервден Сактанов Тагдырали Тажиевич, Пазылов Кубанычбек Турдубаевич (жергиликтүү өз алдынча башкаруунун өкүлчүлүктүү органдарынан) киргизилди.  

Кыргыз Республикасынын Борбордук шайлоо комиссиясы бүгүн, 18-марттагы жыйынында Майлуу-Суу, Талас, Айтматов, Ноокат жана Кара-Суу аймактык шайлоо комиссияларынын жергиликтүү кеңештердин депутаттарынын ыйгарым укуктарын мөөнөтүнөн мурда токтотуу, катталган талапкерди депутаттыкка талапкерлердин тизмесинен чыгаруу жана бош калган мандаттарды кийинки талапкерлерге өткөрүп берүү жөнүндө чечимдерин бекитти. - Майлуу-Суу шаардык кеңешинин депутаты Темирова Гулипа Мамыровнанын (“Эл биримдиги” депутаттык фракциясы) ыйгарым укугу берген арызынын негизинде токтотулуп, бош калган мандат шайлоочулардын добуштарынын көбүн алып шайланган кийинки талапкер Мырзасапарова Тумаркан Алишеровнага (“Эл биримдиги” саясий партиясы) өткөрүлүп берилди; - Талас районунун Беш-Таш айылдык кеңешинин депутаты Байтиков Марат Каныбековичтин ыйгарым укугу берген арызынын негизинде токтотулду; - Айтматов районунун Аманбаев айылдык кеңешинин депутаты Качиев Батыркул Эшембековичтин ыйгарым укугу берген арызынын негизинде токтотулуп, бош калган мандат шайлоочулардын добуштарынын көбүн алып шайланган кийинки талапкер Сыдыкова Динара Токтогуловнага өткөрүлүп берилди; - Ноокат районунун А. Мирмахмудов айылдык кеңешинин депутаты Мирзахамдамова Наргизахон Миркабиловнанын ыйгарым укугу берген арызынын негизинде токтотулуп, бош калган мандат шайлоочулардын добуштарынын көбүн алып шайланган кийинки талапкер Раймжанова Гүлмирахан Кадырбековнага өткөрүлүп берилди; - Кара-Суу районунун Папан айылдык кеңешинин депутаты Авазова Айгүл Авазовнанын ыйгарым укугу берген арызынын негизинде токтотулуп, бош калган мандат шайлоочулардын добуштарынын көбүн алып шайланган кийинки талапкер Балтабаева Канзадабү Муктаржановнага өткөрүлүп берилди.  

Кыргыз Республикасынын Борбордук шайлоо комиссиясы бүгүн, 18-марттагы жыйынында Ормонов Улугбек Зулпукаровичке № 10 көп мандаттуу шайлоо округу боюнча, Калбердиева Мавлюда Калмаматовнага № 11 көп мандаттуу шайлоо округу боюнча, Чойбеков Бактыбек Каныбековичке № 17 көп мандаттуу шайлоо округу боюнча жана Мурзакимова Алтынкуль Жээнбековнага № 29 көп мандаттуу шайлоо округу боюнча Кыргыз Республикасынын Жогорку Кеӊешинин депутаттарынын бош мандаттарын өткөрүп берүү боюнча токтом кабыл алды. У.З. Ормонов, М.К. Калбердиева, Б.К. Чойбеков жана А.Ж. Мурзакимова Кыргыз Республикасынын Жогорку Кеӊешинин депутаттары болуп катталып, аларга белгиленген үлгүдөгү ырастама жана төш белгилер берилди.

Өткөрүү датасы: 2026-жылдын 18-марты Убактысы: 12:00 Өткөрүлүүчү жери: жыйналыштар залы   Кыргыз Республикасынын Жогорку Кеңешинин депутатынын бош мандатын өткөрүп берүү жөнүндө (баяндамачы – Берикбаева К.К., шайлоолорду уюштуруу бөлүмүнүн башчысы) Кыргыз Республикасынын Жогорку Кеңешинин депутатынын бош мандатын өткөрүп берүү жөнүндө (баяндамачы – Берикбаева К.К., шайлоолорду уюштуруу бөлүмүнүн башчысы) Кыргыз Республикасынын Жогорку Кеңешинин депутатынын бош мандатын өткөрүп берүү жөнүндө (баяндамачы – Берикбаева К.К., шайлоолорду уюштуруу бөлүмүнүн башчысы) Кыргыз Республикасынын Жогорку Кеңешинин депутатынын бош мандатын өткөрүп берүү жөнүндө (баяндамачы – Берикбаева К.К., шайлоолорду уюштуруу бөлүмүнүн башчысы) Майлуу-Суу, Талас, Айтматов, Ноокат жана Кара-Суу аймактык шайлоо комиссияларынын жергиликтүү кеңештердин депутаттарынын ыйгарым укуктарын мөөнөтүнөн мурда токтотуу жана бош калган мандаттарды шайланган депутаттардан кийинки талапкерлерге өткөрүп берүү жөнүндө чечимдерин бекитүү тууралуу (баяндамачы – Берикбаева К.К., шайлоолорду уюштуруу бөлүмүнүн башчысы) Ноокат аймактык шайлоо комиссиясынын курамына өзгөртүүлөрдү киргизүү жөнүндө (баяндамачы – Берикбаева К.К., шайлоолорду уюштуруу бөлүмүнүн башчысы)

Бүгүн, 16-марттагы жыйынында Кыргыз Республикасынын Борбордук шайлоо комиссиясы Кыргыз Республикасынын Жогорку Кеңешинин депутаты Жунушалиева Гүлсүнкан Ишенгазиевнанын ыйгарым укуктарын жеке арызынын негизинде мөөнөтүнөн мурда токтотту. КР Жогорку Кеңешинин депутаты Гүлсүнкан Жунушалиеванын ырастамасы жараксыз деп таанылат. Г.И. Жунушалиева № 29 көп мандаттуу шайлоо округунан КР Жогорку Кеңешинин депутаттагына шайланган.

Өткөрүү датасы: 2026-жылдын 16-марты Убактысы: 18-00 Өткөрүлүүчү жери: жыйналыштар залы   1. Кыргыз Республикасынын Жогорку Кеңешинин депутаты Жунушалиева Гүлсүнкан Ишенгазиевнанын ыйгарым укуктарын мөөнөтүнөн мурда токтотуу жөнүндө (баяндамачы – Берикбаева К.К., шайлоолорду уюштуруу бөлүмүнүн башчысы)

Бүгүн, 15-марттагы жыйынында Кыргыз Республикасынын Борбордук шайлоо комиссиясы Кыргыз Республикасынын Жогорку Кеңешинин депутаты Азыгалиев Нурланбек Асанбековичтин ыйгарым укуктарын жеке арызынын негизинде мөөнөтүнөн мурда токтотту.   КР Жогорку Кеңешинин депутаты Нурланбек Азыгалиевдин ырастамасы жараксыз деп таанылат. Н.А. Азыгалиев №17 көп мандаттуу шайлоо округунан КР Жогорку Кеңешинин депутаттагына шайланган.

Өткөрүү датасы: 2026-жылдын 15-марты Убактысы: 14-00 Өткөрүлүүчү жери: жыйналыштар залы   1. Кыргыз Республикасынын Жогорку Кеңешинин депутаты Азыгалиев Нурланбек Асанбековичтин ыйгарым укуктарын мөөнөтүнөн мурда токтотуу жөнүндө (баяндамачы – Берикбаева К.К., Шайлоолорду уюштуруу бөлүмүнүн башчысы)

Кыргыз Республикасынын Шайлоо жана референдум өткөрүү боюнча борбордук комиссиясынын төрагасы Тынчтык Шайназаров баштаган өкүлдөрү КМШ, ШКУ жана ТМУ (Түрк мамлекеттер уюмунун) байкоо миссияларынын курамында Казакстан Республикасындагы республикалык референдумга мониторинг жүргүзүүгө катышууда. КМШнын байкоо миссиясынын курамына КР БШК төрагасы Т. Шайназаров кирди, ТМУ миссиясынын курамында КР БШК мүчөсү Абдыжапар Бекматов, ал эми ШКУ миссиясынын курамында Кабылбек Мамбетаипов жана КР БШК аппаратынын кызматкерлери иш алып барышууда. Мындан тышкары, КР БШКнын атайын өкүлдөрү жана системдик администраторлору КМШ миссиясынын алкагында Алматы жана Тараз шаарларындагы добуш берүү процессине мониторинг жүргүзүүгө катышып жатышат. Референдумдун алдында КР БШК төрагасы Т. Шайназаров Казакстан Республикасынын Борбордук шайлоо комиссиясынын төрагасы Нурлан Абдиров менен жолугушуу өткөрдү. Н. Абдиров референдумга даярдык көрүү жана шайлоо комиссияларынын жумуштары, ошондой эле эл аралык байкоочулардын катышуусу тууралуу маалымат берди. Ал байкоо жүргүзүүгө катышып, колдоо көрсөткөндүгү үчүн ыраазычылык билдирди. Өз кезегинде Т. Шайназаров референдумдун ийгиликтүү өтүшүн каалады. Республикалык референдумга коюлган негизги маселе болуп, төмөнкү суроо менен кошо Казакстан Республикасынын жаңы Конституциясынын долбоору саналат: “Сиз Казакстан Республикасынын 2026-жылдын 12-февралында жалпыга маалымдоо каражаттарында жарыяланган жаңы Конституциясынын долбоорун кабыл аласызбы?” 14-мартта эл аралык байкоочулардын катышуусунда брифинг өткөрүлдү. Аккредитациянын жыйынтыгында референдумга байкоо жүргүзүүгө 38 чет мамлекеттен жана 11 эл аралык уюмдан 359 өкүл катышууда. Шайлоочулардын тизмесине 12 461 796 адам киргизилген. Референдумду уюштурууга 10 658 комиссия, анын ичинде 247 аймактык комиссия жана 10 411 участкалык комиссия тартылган. Чет өлкөлөрдө добуш берүү 62 чет мамлекеттеги Казакстан Республикасынын дипломатиялык өкүлчүлүктөрүнүн алдындагы 80 шайлоо участогунда уюштурулган. Эл аралык байкоочулар шайлоо участокторуна барышат, добуш берүүнүн жүрүшүнө байкоо салышат, ошондой эле добуштарды эсептөө процедурасына байкоо жүргүзүүгө катышышат. Маалымат үчүн: 2026-жылдын 11-февралында Казакстан Республикасынын Президенти К. Токаев «2026-жылдын 15-мартында республикалык референдум өткөрүү жөнүндө» Жарлыкка кол койгон. Конституциянын долбооруна ылайык, негизги өзгөртүүлөр төмөнкүлөрдү камтыйт: • эки палаталуу парламенттен бир палаталуу парламентке өтүү: учурдагы парламент Мажилис жана Сенаттан турат. Долбоордо 145 депутаттан турган жана кеңейтилген ыйгарым укуктарга ээ Курултай аттуу бир палаталуу парламент түзүү сунушталууда; • парламент депутаттарын пропорционалдык шайлоо системасы боюнча беш жылдык мөөнөткө шайлоо; • президенттин ыйгарым укуктарын жети жылдык бир мөөнөт менен чектөө; • президент тарабынан парламенттин (Курултайдын) макулдугу менен дайындалуучу вице-президенттин кызматын киргизүү; • жана башка өзгөртүүлөр.

Кыргыз Республикасынын Борбордук шайлоо комиссиясы бүгүн, 14-мартта өзүнүн жыйынында Кыргыз Республикасынын Жогорку Кеңешинин депутаты Ташиев Шаирбек Кыдыршаевичтин ыйгарым укуктарын жеке арызынын негизинде мөөнөтүнөн мурда токтотту.   КР Жогорку Кеңешинин депутаты Шаирбек Ташиевдин ырастамасы жараксыз деп таанылат.

Өткөрүү датасы: 2026-жылдын 14-марты Убактысы: 14-30 Өткөрүлүүчү жери: жыйналыштар залы   №11 көп мандаттуу шайлоо округу боюнча Кыргыз Республикасынын Жогорку Кеңешинин депутаттыгына талапкер Ташиев Шаирбек Кыдыршаеввичтин ыйгарым укуктарын мөөнөтүнөн мурда токтотуу жөнүндө (баяндамачы – Берикбаева К.К., Шайлоолорду уюштуруу бөлүмүнүн башчысы)  

Бүгүн, 14-мартта Кыргыз Республикасынын Борбордук шайлоо комиссиясынын кызматкерлери Бишкек шаарынын аймагын көрктөндүрүү, санитардык тазалоо жана жашылдандыруу боюнча шаардык эки айлык ишембиликке катышты. КР БШКнын кызматкерлери төраганын орун басары Бахадыр Конуровдун жетекчилигинде А.Малдыбаев атындагы Кыргыз улуттук академиялык опера жана балет театрынын артында жайгашкан "Театральный" скверинин бекитилген тилкесинде, ошондой эле ага чектеш аймакта ишембилик өткөрүштү. Иштин жүрүшүндө аймак катуу тиричилик калдыктарынан, кургак бутактардан, пластиктен жана башка таштандылардан тазаланды. Мындай иш-чараларды өткөрүү борбордун санитардык абалын жакшыртууга, ошондой эле айлана-чөйрөгө аяр мамиле кылуу маданиятын калыптандырууга өбөлгө түзөт. Эскерте кетсек, Бишкек шаарында 2026-жылдын 14-мартынан 16-майына чейин шаардын аймактарын көрктөндүрүү, санитардык тазалоо жана жашылдандыруу боюнча эки айлык ишембилик иш-чарасы өтүүдө.  

Кыргыз Республикасынын Шайлоо жана референдум өткөрүү боюнча борбордук комиссиясында “КР Жаштар парламенти” долбоорунун катышуучулары - студенттер менен маалыматтык-агартуу жолугушуусу болуп өттү. Жолугушууга өлкөнүн ар кайсы жогорку окуу жайларынын 1-4-курстарынын ар кандай багытта билим алышкан 30 студенти катышты. Катышуучулар долбоорго арыз берген 200гө жакын студенттин ичинен тандалып алынган. КР БШК мүчөсү Узарбек Жылкыбаев студенттерге Кыргыз Республикасынын шайлоо системасы, Борбордук шайлоо комиссиясынын ролу жана ыйгарым укуктары, ошондой эле шайлоолорду уюштуруу жана өткөрүү өзгөчөлүктөрү жөнүндө айтып берди. Жолугушуунун жүрүшүндө ачык суроо-жооп сессиясы болуп, анын алкагында студенттер шайлоо процессинин маселелери боюнча бир катар суроолорду узатышты. Атап айтканда, катышуучуларды шаардык кеңештердеги депутаттардын саны жана ыйгарым укуктары, округдар боюнча шайлоонун азыркы системасына өтүү, шайлоолорду өткөрүүдө санариптик технологияларды колдонуу жана аларды текшерүү механизмдери, ошондой эле жаштардын шайлоого катышуусунун төмөндүгүнүн себептери жана алардын шайлоо процессине катышуусун жогорулатуунун мүмкүн болгон жолдору кызыктырды. Бардык суроолорго КР БШК мүчөсү Узарбек Жылкыбаев тарабынан толук түшүндүрмөлөр берилди. Мындан тышкары, студенттерге Кыргыз Республикасында шайлоолорду уюштуруу жана өткөрүүдө колдонулуучу шайлоо жабдууларынын иши көрсөтүлдү. Катышуучулар ошондой эле демонстрациялык режимде добуш берүү процессин сынап көрүштү. Мындай жолугушуулар жаштардын укуктук жана шайлоо сабаттуулугун жогорулатууга, жаш жарандардын шайлоо процесстерине болгон кызыгуусун арттырууга жана активдүүлүгүн калыптандырууга өбөлгө түзөт. Жолугушууну КР БШКнын Жарандык билим берүү жана шайлоо технологиялары борбору (ЖБШТБ) уюштурду.

Кыргыз Республикасынын Борбордук шайлоо комиссиясы бүгүн, 13-мартта өзүнүн жыйынында Кыргыз Республикасынын Жогорку Кеңешинин депутаты Зулушев Курманкул Токторалыевичтин  ыйгарым укуктарын жеке арызынын негизинде мөөнөтүнөн мурда токтотту. КР Жогорку Кеңешинин депутаты Курманкул Зулушевдин ырастамасы жараксыз деп таанылат.  

Өткөрүү датасы: 2026-жылдын 13-марты Убактысы: 19-00 Өткөрүлүүчү жери: жыйналыштар залы   1. № 10 көп мандаттуу шайлоо округу боюнча Кыргыз Республикасынын Жогорку Кеңешинин депутаттыгына талапкер Зулушев Курманкул Токторалыевичтин ыйгарым укуктарын мөөнөтүнөн мурда токтотуу жөнүндө (баяндамачы – Берикбаева К.К., Шайлоолорду уюштуруу бөлүмүнүн башчысы)