“Ысык-Көл облусунун Каракол шаардык кеңешинин депутаттарын шайлоонун натыйжаларын аныктоо тууралуу Каракол аймактык шайлоо комиссиясынын протоколун бекитүү жөнүндө”
Токтом
2012-жылдын 4-мартында Кыргыз Республикасынын Президентинин 2011-жылдын 22-декабрындагы ПЖ №29 Жарлыгы менен дайындалган Ысык-Көл облусунун Каракол шаардык кеңешинин депутаттарын шайлоо өткөрүлдү.
Кыргыз Республикасынын Шайлоо жана референдум өткөрүү боюнча борбордук комиссиясы Каракол шаарынын аймактык жана участкалык шайлоо комиссияларынан келип түшкөн шайлоо документтерин, ошондой эле шайлоо процессинин субьектилеринин даттанууларын, актыларын карап чыгып, Каракол шаардык кеңешинин депутаттарын шайлоодо №№ 3138, 3150 шайлоо участкаларында шайлоочулардын эрк ниетин билдирүүсүнө таасир тийгизген, добуштардын аныктыгын тактоого мүмкүндүк бербеген бузууларды аныктады.
Участкалык шайлоо комиссияларынан түшкөн протоколдордун, Каракол аймактык шайлоо комиссиясынын добуш берүүнүн жыйынтыктары тууралуу протоколунун жана жыйынды таблицасынын негизинде, “Кыргыз Республикасынын шайлоо жана референдум өткөрүү боюнча шайлоо комиссиялары жөнүндө” Кыргыз Республикасынын Мыйзамынын 7-беренесинин 1-бөлүгүнүн 2-24-26-пункттарын, 2-бөлүгүнүн 5-пунктун, “Жергиликтүү кеңештердин депутаттарын шайлоо жөнүндө” Кыргыз Республикасынын Мыйзамынын 37-беренесинин 4-бөлүгүн, 38-беренесинин 5-6-бөлүктөрүн, 40-беренесинин 4-бөлүгүн, 56-беренесин жетекчиликке алып, Кыргыз Республикасынын Шайлоо жана референдум өткөрүү боюнча борбордук комиссиясы
ТОКТОМ КЫЛАТ:
1. Каракол шаардык кеңешинин депутаттарын шайлоо өттү деп таанылсын.
2. Каракол шаарынын №№ 3138, 3150 шайлоо участкаларындагы добуш берүүнүн жыйынтыгы жараксыз деп табылсын.
Каракол шаарынын башка баардык шайлоо участкалары боюнча добуш берүүнүн жыйынтыгы анык деп табылсын.
3. Ушул токтом менен жараксыз деп таанылган шайлоо участкаларын эсепке албаганда, 2012-жылдын 4-мартында өткөн Каракол шаардык кеңешинин депутаттарын шайлоонун натыйжаларын аныктоо жөнүндө Каракол аймактык шайлоо комиссиясынын 2012-жылдын 10-мартындагы протоколу бекитилсин.
4. Каракол шаардык кеңешинин депутаттыгына төмөндөгү талапкерлер Каракол шаардык кеңешинин депутаты болуп шайланды деп эсептелсин (тизме тиркелет).
Аларга белгиленген үлгүдөгү күбөлүк жана төш белги берилсин.
5. Бул токтом, добуш берүүнүн жыйынтыктары, Каракол шаардык кеңешинин депутаттарын шайлоонун жыйынды таблицасы жана шайлоонун натыйжалары (тиркелет) “Эркин Тоо” газетасына жарыялансын жана Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жайгаштырылсын.
6. Бул токтом Каракол шаарынын №№ 3138, 3150 шайлоо участкалары боюнча бузууларга жол берген адамдарга карата Кыргыз Республикасынын мыйзамдарына ылайык тийиштүү чара көрүү үчүн Кыргыз Республикасынын Башкы Прокуратурасына жиберилсин.
7. Бул токтомдун аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын төрагасынын орун басары А.Т.Шайымкуловага жүктөлсүн.
ТӨРАГА Т. АБДРАИМОВ
Бишкек ш, 2012-жылдын 13-марты
№40
