КР БШКбүгүн 2016-жылдын 14-октябрында БУУнун Өнүктүрүү долбоорунун техникалык колдоосу менен журналисттер үчүн жергиликтүү кеңештерге депутаттарды шайлоону чагылдыруунун өзгөчөлүктөрү боюнча семинар-тренинг өткөрдү.
Иш-чарага республиканын бардык региондорунан райондук, облустук, республикалык ЖМКлардан 80 журналист катышып, 2016-жылдын 11-декабрында өтүүчү жергиликтүү кеңештерге шайлоону маалыматтык жактан камсыздоо боюнча сунуштамаларды алышты.
Семинар-тренинг журналисттердин шайлоо мезгилинде иштөөсүнүн эң маанилүү өңүттөрүн, анын ичинде ЖМКны аккредиттөө маселелерин, шайлоо мыйзамдарынын обзорун, шайлоону уюштуруунун жана өткөрүүнүн негизги этаптарын, шайлоо процессинин жүрүшү жөнүндө жарандарды маалымдоонун өзгөчөлүктөрүн, шайлоо алдындагы үгүт иштеринин эрежелерин камтыды.
“Жарандардын шайлоо институтуна ишеними шайлоо реформасынын натыйжасында 2015-жылдагы парламенттик шайлоодон кийин кайрадан арта баштагады. Эми аны мындан ары чыңдап, туруктуу деңгээлге жеткизүү зарыл. 11-декабрда 405 жергиликтүү кеңешке өтө турган шайлоо биз үчүн абдан маанилүү, өз айырмачылыктары бар окуя. Жарандар жергиликтүү жамаатты өнүктүрүүнүн эң маанилүү маселелерин чечүү милдетин аркалаган жергиликтүү өз алдынча башкаруу органдарын – кеңештерди шайлайт. Ар бир региондо жарандарга шайлоонун жүрүшү тууралуу так маалыматты өз убагында жеткизүү чоң мааниге ээ. Аймактык шайлоо комиссиялары ЖМК өкүлдөрү менен тыкыс кызматташып, иштөөсү үчүн Борбордук шайлоо комиссиясыбүт күч-аракетин жумшайт”, деди КР БШКнын төрагасы Н.Шайлдабекова өзүнүн куттуктоо сөзүндө.
КР БШКнын төрагасы, ошондой эле, ЖМКлар жарандарга жергиликтүү шайлоо тууралуу маалымдоодон сырткары,шайлоочулардын добушун сатып алуу сыяктуу терс көрүнүштү азайтууда негизги ролду аткара алышарын белгиледи.
“Добуш берүүнүн жыйынтыктарын саноону, чогултууну, чыгарууну автоматташтыруу шайлоонун жыйынтыктарын комиссиялардын деңгээлинде бурмалоонун мүмкүнчүлүгүн иш жүзүндө жокко чыгарат. Добуш берүүнүн керектүү жыйынтыктарын мурдагыдай комиссиялардан сатып алуунун мүмкүн эместиги талапкерлер жана партиялар тарабынан шайлоочулардытүздөн-түз сатып алуу фактыларынын көбөйүшүнө алып келди. Бирок добуштарды сатып алууга каршы сапаттуу маалыматтык кампания бул терс көрүнүшкө каршы күрөшүүгө жардам берет”, деп кошумчалады Н.Шайлдабекова.
Шайлоо алдындагы кампаниянын негизги этаптары КР БШКнын уюштуруу бөлүмүнүн башчысы А. Өмуралиевдин сөзүндө чагылдырылды.
КР БШКнын төрагасынын орун басары А.Абдрахматова семинар-тренингдин катышуучуларын шайлоонун укуктук өңүттөрү менен тааныштырып, шайлоонун жүрүшүндө маалымдоо жана үгүттөө эрежелерин бузгандык үчүн жоопкерчиликтин маселелери тууралуу баяндап берди. КР БШКнын мүчөсү Г.Джурабаева ЖМКларды аккредиттөөнүн эрежелерин түшүндүрдү.
БУУнун Өнүктүрүү долбоорунун медиа-кеңешчиси Г.Торалиева шайлоону ЖМКда чагылдыруунун маселелери боюнча чыгып сүйлөдү. Семинар-тренингдин катышуучулары шайлоонун жүрүшүн маалымдоо процессинин өзгөчөлүктөрү тууралуу кеңири маалымат алышты.
Ошондой эле, БШКнын мүчөлөрү жана журналисттер шайлоо мыйзамдарынын өзгөчөлүктөрүн, ЖМКларды аккредиттөөнүн шарттарын, маалымдоонун жана шайлоо алдындагы үгүт иштерин жүргүзүү маселелерин талкуулашты. Иш-чаранын катышуучулары БШК, БШКнын мүчөлөрү, БШКнын ар бир облус боюнча региондук кураторлору менен маалымат алмашуу тартибин макулдашты. Региондордогу кампаниянын жүрүшү тууралуу маалыматтык билдирүүлөр райондордогу жана облустардагы басылма жана электрондук ЖМКларда чагылдырылмакчы.
Семинар-тренингдин соңунда катышуучуларга сертификаттар тапшырылды. Региондук жана республикалык ЖМКлардын өкүлдөрү иш-чараны өз убагында уюштурганы үчүн КР БШКга жана БУУнун Өнүктүрүү долбооруна ыраазычылык билдиришти.
КР БШКнын басма сөз кызматы
