22- сентябрда КР Шайлоо жана референдум өткөрүү боюнча борбордук комиссиясынын ыкчам аракет кылуучу координациялык тобуна Москва районунун Александровка айылынын жашоочусу У. Давузов аттуу жарандан кайрылуу түшкөн.

Давузов жакында БШКнын расмий сайтындагы Тизме порталына кирип өзүн шайлоочулардын тизмесинен тактоону чечкен. Ал шайлоолордо көп жылдан бери Александровка айылында добуш берип жүргөнүнө карабай, Тизме порталынын маалыматы боюнча бул жолу анын добуш берүүчү шайлоо участогу Бишкек шаарындагы Огонбаев көчөсүндөгү №1352-шайлоо комиссиясынын участогу болуп калганын билдирген.

№1352-шайлоо комиссиясынын мүчөлөрү да У. Давузовдун добуш бере турган жери ушул шайлоо участогу экендигин билдиришти.  

У. Давузов КР БШК кызматкерлерине бир жылдан бери анын паспорту жок экендигин, ал “Береке – Грант” соода борборунан чөнтөк телефонду узартып төлөө менен сатып алгандыгына байланыштуу паспорту ошол чөнтөк телефон саткан жерде күрөөдө жаткандыгын айткан.

22-сентябрда бул маалымат Бишкектин Ленин райондук ички иштер бөлүмүнө жиберилди. Ленин райондук ички иштер бөлүмү аны ЭЖУИ ЕРПП №02-001-2020-020161. боюнча каттап, ишти андан ары Свердлов районунун тиешелүү бөлүмүнө өткөрүп берди.

КР БШК Маалыматтык бөлүмү