Кыргыз Республикасынын Шайлоо жана референдум өткөрүү боюнча Борбордук комиссиясынын төрагасы Туйгуналы Абдраимов Кыргыз Республикасынын Президенти Роза Отунбаеванын наамына кат жөнөттү.

Борбордук шайлоо комиссиясынын төрагасы Т.Абдраимов мамлекет Башчысы Р.Отунбаеванын жетекчилигинин астында улуттук макулдашуу жөнүндө Меморандумга кол коюу чакырыгы менен  Кыргыз Республикасынын Президентинин кызмат ордуна катталган талапкерлердин Форумун өткөрүүнү сунуштайт.

Төмөндө каттын толук текстин келтиребиз:

“Урматтуу Роза Исаковна! Кыргыз Республикасынын шайлоо мыйзамдарына ылайык учурда Кыргыз Республиксынын Президентинин кызмат ордуна талапкерлерди көрсөтүү жүрүп жатат, ал  2011-жылдын 15-августунда аяктайт. 11-августтагы маалымат боюнча Кыргыз Республикасынын Борбордук шайлоо комиссиясына 54 талапкер арыз берген, аларды каттоо 25-сентябрда аяктайт, андан кийин катталган талапкерлер шайлоо алдындагы үгүттү башташат.

Урматтуу Роза Исаковна! Сизге Кыргыз Республикасынын Президентин шайлоону эркин, акыйкат жана таза өткөрүү жана эгемендүү Кыргызстандын тарыхында биринчи жолу мамлекет Башчысынын ыйгарымын жаңы шайланган Президентке тынчтык жолу менен өткөрүп берүү тарыхый вазийпасы жүктөлдү.

Ушуга байланыштуу Кыргыз Республикасынын Борбордук шайлоо комиссиясы талапкерлердин үгүт иши башталаар алдында Сиздин жетекчилигиңиз менен улуттук макулдашуу жөнүндө Меморандумга кол коюу чакырыгы менен катталган талапкерлердин Форумун өткөрүүнү сунуштайт, ал шайлоонун жыйынтыгын расмий жарыялаганга чейин күчүндө болот”.

Кыргыз Республикасынын Борбордук шайлоо комиссиясынын Басма сөз кызматы