Башкы Жаңылыктар Эл аралык байкоочулар Кыргыз Республикасынын жергиликтүү кеңештеринин депутаттарын …

Эл аралык байкоочулар Кыргыз Республикасынын жергиликтүү кеңештеринин депутаттарын шайлоого жогору баа беришти

18-Ноя, 2024

2024-жылдын 17-ноябрында өткөн жергиликтүү кеңештерге шайлоого көз салган эл аралык байкоочулар шайлоо процессине даярдык кѳрүү жана өткөрүү деңгээлин жогору баалашты. Бул тууралуу алар КР БШКда өткөн брифингде билдиришти.

Мирвохид Азимов, Түрк мамлекеттери уюмунун (ТМУ) Башкы катчысынын орун басары: “Биз, ТМУнун байкоочулар миссиясы, шайлоо улуттук мыйзамдарга ылайык өттү деп билдиребиз. Биз олуттуу көйгөйлөрдү же мыйзам бузууларды тапкан жокпуз. Шайлоо процесси ачык, жеткиликтүү жана ишенимдүү болгонун белгилейбиз. Бул шайлоолор Кыргызстандын өнүгүшүндө жана гүлдөшүндө маанилүү кадам болоруна ишенебиз”.

Баубакар Адаму, Ислам кызматташтык уюмунун (ИКУ) Башкы катчылыгынын Африка иштери боюнча департаментинин директору: “Биз шайлоолорго канааттануу менен байкоо жүргүздүк жана алар эл аралык стандарттарга ылайык өткөнүн белгилегибиз келет. ИКУнун Башкы катчылыгынан Кыргызстандын элин жана Борбордук шайлоо комиссиясын шайлоонун ийгиликтүү өтүшү менен куттуктайбыз. Бул шайлоолор Кыргызстандын Борбордук шайлоо комиссиясынын демократиялык практиканы жана шайлоо системасындагы институттук прогрессти илгерилетүүдѳгү жана бекемдөөдөгү лидерлигин Кыргызстанда гана эмес, аймактык деңгээлде да далилдейт деп эсептейбиз».

Сеунг Райол Ким, Дүйнөлүк шайлоо органдары ассоциациясынын (AWEB) шайлоону окутуу жана байкоо жүргүзүү боюнча директору: “Биз шайлоо органдарынын кызматкерлеринин жаңы технологияларды колдонуудагы компетенттүүлүгүнө байкоо жүргүздүк. Биз Кыргыз Республикасынын Борбордук шайлоо комиссиясынын таза жана демократиялык шайлоо өткөрүүдөгү тажрыйбасын жана кесипкөйлүгүн жогору баалайбыз жана алар биздин уюмга мүчө болгонуна сыймыктанабыз”.

Алиев Шайтдин Сардар, Азербайжан Республикасынын Борбордук шайлоо комиссиясынын мүчөсү: “Биз Кыргызстандын жарандарына шайлоо укуктарын жүзөгө ашыруу үчүн бардык шарттар түзүлгөндүгүнө күбө болдук: шайлоо комиссиялары Борбордук Азияда жок жаңы жабдуулар менен жабдылган, Таза, ачык жана ишенимдүү шайлоо өткөрүү үчүн талапкерлерге да, шайлоочуларга да бардык шарттар түзүлгөн. Бул Кыргыз Республикасынын Борбордук шайлоо комиссиясы тарабынан жасалган чоң иш, биз сиздерди бул жетишкендик менен куттуктайбыз. Биз Кыргызстанды эл аралык стандарттарга жооп берген демократиялык жана ачык-айкын шайлоонун ийгиликтүү өтүшү менен куттуктайбыз.”

Юнусов Баходиржан Жалолдинович, Өзбекстан Республикасынын Борбордук шайлоо комиссиясынын мүчөсү: «Биз жаңы технологиялардын кайра-кайра добуш берүүнүн, же «карусельдердин» алдын алууга кандайча жардам берерин байкадык. Биз бардык шайлоо участокторунда онлайн-трансляция жүргүзүлүп, жарандардын добуш берүү процесси кандай өтүп жатканын бардыгы көрүп жатканын кѳрдүк. Участкалык шайлоо комиссияларынын мүчөлөрүнүн компетенттүү жана кесипкөй ишин өзгөчө белгилеп кеткибиз келет”.

Эл аралык байкоочулар шайлоо күнү Бишкек жана Кант шаарларындагы шайлоо участокторун кыдырып, андан соң белгилүү бир жыйынтыкка келишкенин айтышты:

  • шайлоолор ачык-айкын, улуттук мыйзамдарга жана эл аралык стандарттарга ылайык өттү, бул демократиялык практиканы бекемдөөгө жана институционалдык өнүгүүгө өбөлгө түзөрү шексиз;

  • шайлоону уюштуруу жогорку деңгээлде өттү, шайлоочулар үчүн, анын ичинде ден соолугунун мүмкүнчүлүгү чектелгендер үчүн бардык зарыл шарттар түзүлдү;

  • участкалык комиссиялардын мүчөлөрү чоң кесипкөйлүк көрсөтүштү;

  • шайлоочуларды идентификациялоо жана санариптик добуш берүү үчүн заманбап технологиялар ийгиликтүү колдонулду, бул добуш берүүнү коргоонун жогорку деңгээлин камсыз кылды (1 шайлоочу – 1 добуш);

  • шайлоо тынч өттү, шайлоонун жыйынтыгына таасир этүүчү мыйзам бузуулар аныкталган жок;

  • Шайлоого аялдар жана улгайган адамдар активдүү катышты.

Эл аралык байкоочулар КР БШКга шайлоого байкоо жүргүзүүгө катышуу мүмкүнчүлүгү үчүн ыраазычылык билдиришти жана демократиялык процесстерди чыңдоодо Кыргызстан менен кызматташууну улантууга даяр экендиктерин билдиришти.

Н.Шайлдабекова жергиликтүү кеңештердин шайлоосуна байкоо жүргүзүүгө катышкан бардык эл аралык байкоочуларга ыраазычылык билдирип, алардын ишин жогору баалады. КР Борбордук шайлоо комиссиясынын төрагасы Кыргызстан бардык алдыңкы эл аралык тажрыйбаны колдонуу менен шайлоо процессин мындан ары да өркүндөтөөрүнө ишендирди.

КР Борбордук шайлоо комиссиясынын маалыматы боюнча, 54 эл аралык байкоочу аккредитациядан өткѳн.

Он өлкөнүн: Азербайжан, Беларусь, Грузия, Индия, Казакстан, Молдова, Монголия, Россия, Түркия жана Өзбекстан Борбордук шайлоо комиссиялары өз өкүлдөрүн жөнөтүштү. Байкоо жүргүзүүгө шайлоо органдарынын бүткүл дүйнөлүк ассоциациясы (A-WEB), Ханс Зайдель фонду жана башка эл аралык уюмдардын өкүлдөрү, ощондой эле Түрк мамлекеттеринин уюму (ТМУ), Ислам Кызматташтык Уюму (ИКУ), Евробиримдиктин Кыргыз Республикасындагы өкүлчүлүгү, ошондой эле Улуу Британиянын, Ирандын, Кытайдын, АКШнын, Швейцариянын, Россиянын жана Япониянын элчиликтери да катышты.

 

Башка жаңылыктар

Бардык жаңылыктар
КР БШК өкүлдөрү Чүй облусунун мамлекеттик органдарынын жана жергиликтүү өз алдынча башкаруу органдарынын жетекчилери менен Президенттик шайлоого даярдык маселелерин талкуулашты
20-Ноя, 2026

КР БШК өкүлдөрү Чүй облусунун мамлекеттик органдарынын жана жергиликтүү өз алдынча башкаруу органдарынын жетекчилери менен Президенттик шайлоого даярдык маселелерин талкуулашты

2026-жылдын 19-ноябрында Кыргыз Республикасынын Президентинин Чүй облусундагы ыйгарым укуктуу өкүлүнүн аппаратында 2027-жылдын 27-январына дайындалган Кыргыз Республикасынын Президентин шайлоого даярдык көрүү маселелери боюнча жумушчу жолугушуу болуп өттү.Жолугушууга КР БШК төрагаларынын орун басарлары Л. Лурова жана Р. Жакышов, БШКнын мүчөсү М. Темирбаева, ошондой эле Кыргыз Республикасынын Президентинин Чүй облусундагы ыйгарым укуктуу өкүлүнүн орун басары Г. Кыштобаева катышып, иш-чараны биргеликте өткөрүштү.Жолугушууга жергиликтүү өз алдынча башкаруу органдарынын жетекчилери, укук коргоо органдарынын өкүлдөрү жана облустагы шайлоо комиссияларынын мүчөлөрү да катышты.Л. Лурова катышуучуларга облуста шайлоого даярдык көрүүнүн жүрүшү тууралуу маалымат берди. Ал календардык планда белгиленген иш-чараларды өз мөөнөтүндө аткарууга, шайлоо мыйзамдарынын талаптарын так сактоого, ошондой эле шайлоо комиссияларынын мамлекеттик органдар жана жергиликтүү өз алдынча башкаруу органдары менен натыйжалуу кызматташуусуна өзгөчө көңүл бурду.Р. Жакышов шайлоо мыйзамдарындагы өзгөртүүлөр, жарандардын Кыргыз Республикасынын Президентин шайлоого катышуусунун жаңы мүмкүнчүлүктөрү жана жаңыланган шайлоо технологиялары тууралуу маалымат берди.Ал эми майыптыгы бар шайлоочулардын жана жарандардын айрым категорияларынын шайлоо укуктарын өркүндөтүү жана ишке ашыруу боюнча жумушчу топтун жетекчиси М. Темирбаева шайлоо участкаларынын жеткиликтүүлүгүн камсыз кылуу боюнча көрүлүп жаткан чараларды тааныштырды.
Кененирээк билүү >>
КР БШК Кыргыз Республикасынын Президентин шайлоодо чет өлкөлөрдө алгачкы 74 шайлоо участогун түздү
20-Ноя, 2026

КР БШК Кыргыз Республикасынын Президентин шайлоодо чет өлкөлөрдө алгачкы 74 шайлоо участогун түздү

Кыргыз Республикасынын Шайлоо жана референдум өткөрүү боюнча борбордук комиссиясы чет мамлекеттердин аймагында 74 шайлоо участогун түзүү жөнүндө чечим кабыл алды. Учурда шайлоо участокторун ачуу боюнча иштер улантылууда.Мындай чечим 2027-жылдын 27-январына белгиленген Кыргыз Республикасынын Президентин кезектеги шайлоодо чет өлкөлөрдө жашап же жүргөн Кыргыз Республикасынын жарандарынын шайлоо укуктарын камсыз кылуу максатында кабыл алынды.Азыркы учурда алардын эң көбү - 20 шайлоо участогу Россия Федерациясында түзүлдү. Түркия жана Казакстанда 6дан, АКШда 5 шайлоо участогу ачылды.Корея Республикасында жана Италияда 3төн шайлоо участогу иштейт. Өзбекстанда, Германияда, Кытайда жана Бириккен Араб Эмираттарында 2ден шайлоо участогу түзүлдү.Калган 23 шайлоо участогу башка өлкөлөрдө, анын ичинде Австрияда, Чехияда, Словакияда, Польшада, Улуу Британияда, Беларуссияда, Литвада, Венгрияда, Бельгияда, Францияда, Швейцарияда, Сауд Арабиясында, Кувейтте, Катарда, Египетте, Азербайжанда, Тажикстанда, Түркмөнстанда, Малайзияда, Пакистанда, Индияда, Японияда жана Монголияда уюштурулду.Ошентип, бүгүнкү күнгө карата 33 мамлекетте шайлоо участоктору түзүлдү.Добуш берүү күнүнө чейин чет өлкөлөрдө кошумча шайлоо участокторун ачуу пландаштырылууда. Алардын саны жана даректери тууралуу маалымат кошумча жарыяланат.Түзүлгөн шайлоо участокторунун актуалдуу тизмеси жана алардын даректери менен бул жерден таанышууга болот:
Кененирээк билүү >>
КР БШКсы Президенттин кызмат ордуна талапкердин ыйгарым укуктуу өкүлүн каттады
20-Ноя, 2026

КР БШКсы Президенттин кызмат ордуна талапкердин ыйгарым укуктуу өкүлүн каттады

Кыргыз Республикасынын Шайлоо жана референдум өткөрүү боюнча борбордук комиссиясы бүгүнкү жыйынында Кыргыз Республикасынын Президентинин кызмат ордуна талапкер Масалиев Исхак Абсаматовичтин ыйгарым укуктуу өкүлүн каттады.Айдакеева Бегимай Кувандыковна Масалиев Исхак Абсаматовичтин финансылык маселелер боюнча ыйгарым укуктуу өкүлү болуп катталды.Белгилей кетсек, талапкердин ыйгарым укуктуу өкүлүнө белгиленген үлгүдөгү каттоо күбөлүгү берилет.
Кененирээк билүү >>
КР БШКсы "Сезим" фондунан коомдук байкоочуну каттады
20-Ноя, 2026

КР БШКсы "Сезим" фондунан коомдук байкоочуну каттады

Кыргыз Республикасынын Борбордук шайлоо комиссиясы бүгүн, 20-ноябрда «Сезим» майыптыгы бар адамдардын коомдук фондунан коомдук байкоочуну каттоо жөнүндө чечим кабыл алды.Борбордук шайлоо комиссиясына «Сезим» майыптыгы бар адамдардын коомдук фондунан 2026-жылдын 16-ноябрында келип түшкөн билдирүүнүн негизинде Майнаев Камилжан Кыргыз Республикасынын Президентин шайлоого даярдык көрүү жана өткөрүү мезгилинде Ош облусунун аймагындагы бардык шайлоо комиссияларында коомдук байкоочу болуп катталды.Катталган коомдук байкоочуга белгиленген үлгүдөгү күбөлүк берилет.
Кененирээк билүү >>