КР БШК Кант жана Кара-Балта аймактык шайлоо комиссияларынын курамына жана резервине жарандардан жана саясий партиялардан документтерди кабыл алууну жарыялайт
Кыргыз Республикасынын Шайлоо жана референдум өткөрүү боюнча борбордук комиссиясы Кант жана Кара-Балта аймактык шайлоо комиссияларынын резервине жана курамына жарандардан жана саясий партиялардан документтерди кабыл алууну жарыялайт.
“Кыргыз Республикасынын айыл аймактарынын жана шаарларынын деңгээлиндеги административдик-аймактык бирдиктер жөнүндө” Кыргыз Республикасынын 2024-жылдын 18-июлундагы № 128 Мыйзамына ылайык, Чүй облусунун Кант жана Кара-Балта шаарларына облустук маанидеги шаарлардын статусу берилди.
Жогоруда аталган шаарлар өз алдынча административдик-аймактык бирдик болгондугуна байланыштуу алардын аймагында жаңы аймактык шайлоо комиссиясын түзүү зарылчылыгы келип чыкты.
“Кант жана Кара-Балта аймактык шайлоо комиссияларын түзүү жөнүндө” КР БШКнын 2024-жылдын 25-июлундагы № 91 токтому менен Чүй облусунун Кант жана Кара-Балта шаарларынын аймагында тиешелүүлүгүнө жараша Кант жана Кара-Балта аймактык шайлоо комиссиялары түзүлдү.
«Кыргыз Республикасынын шайлоо жана референдум өткөрүү боюнча шайлоо комиссиялары жөнүндө» Кыргыз Республикасынын Мыйзамынын 1-беренесинин 2-пунктуна ылайык: “Кыргыз Республикасынын шайлоо комиссияларынын бирдиктүү системасын шайлоо жана референдум өткөрүү боюнча аймактык шайлоо комиссиялары: Борбордук шайлоо комиссиясынын чечими боюнча - райондук жана шаардык шайлоо комиссиялары түзөт”.
Жогоруда аталган Мыйзамдын 19-беренесинин 1-бѳлүгүнѳ ылайык, “аймактык, участкалык шайлоо комиссиялары беш жылдык мөөнөткө саясый партиялардын өкүлдөрүнүн экиден биринин жана жергиликтүү өз алдынча башкаруунун өкүлчүлүктүү органдарынын өкүлдөрүнүн экиден биринин курамында шайланат”.
Саясий партиялар жана жергиликтүү ѳз алдынча башкаруунун ѳкүлчүлүктүү органдары (жергиликтүү кеңеш) шайлоо комиссияларынын курамын жана резервин кѳрсѳтүүчү субьектер болуп саналышат.
Жогоруда аталган Мыйзамдын 22-беренесинин 1-бѳлүгүнѳ ылайык тѳмөнкүлөр аймактык, участкалык шайлоо комиссиясынын мүчөсү боло албай тургандыгын белгилѳѳ зарыл, алар:
- Жогорку Кеңештин депутаты, жергиликтүү кеңештин депутаты;
- мамлекеттик органдардын жана жергиликтүү өз алдынча башкаруу органдарынын кызмат адамдары;
- судья, укук коргоо жана фискалдык органдын кызматкери, аскер кызматчысы;
- талапкер, талапкердин жана саясый партиянын өкүлү;
- башка мамлекеттин жарандыгы бар адам;
- мыйзамда белгиленген тартипте, соттуулугу алып салынбаган же жоюлбаган адам;
- башка шайлоо комиссиясынын мүчөсү;
- терс негиздер боюнча шайлоо комиссиянын мүчөсүнүн милдеттеринен мөөнөтүнөн мурда бошотулган адам.
Кант жана Кара-Балта аймактык шайлоо комиссияларынын курамына саясий партиялардан талапкерлерди көрсөтүү алардын уставдарына ылайык жүргүзүлөт. Саясий партиялар 2024-жылдын 12-августунда саат 18:00гө чейин Кант жана Кара-Балта аймактык шайлоо комиссияларынын курамына талапкерлердин документтерин Кыргыз Республикасынын Шайлоо жана референдум өткөрүү боюнча борбордук комиссиясына (мындан ары - КР БШК) тапшырышы керек.
Жарандар жана коомдук бирикмелер тиешелүү жергиликтүү өз алдынча башкаруу органына 2024-жылдын 12-августунда саат 18-00гө чейин документтерди тапшырышы керек. Жергиликтүү өз алдынча башкаруу органынын шайлоо комиссиясынын мүчөлүгүнө талапкер тиешелүү калктуу конуштун аймагында жашагандыгы жөнүндө жазуу жүзүндөгү ырастоосу бардык талапкерлердин документтери менен бирге КР БШКга берилет.
Аймактык шайлоо комиссиясынын резервине жана курамына берилүүчү документтердин тизмеси:
- талапкердин аймактык шайлоо комиссиясынын курамында иштөөгө макулдугу жѳнүндѳ арызы жана Кыргыз Республикасынын шайлоо мыйзамдарынын нормаларын сактоо боюнча милдеттенмеси ;
- паспорттун көчүрмөсү;
- иштеген, окуган жерин, билимин көрсөтүү менен ѳмүр баяны тууралуу маалыматы (кадрларды эсепке алуу баракчасы же резюме);
- байланыш маалыматтары: жашаган жеринин дареги, телефон номерлери;
- көрсөткѳн субъектин протоколу.
Көрсөтүүчү субъектер шайлоо комиссиясынын мүчөлүгүнө талапкерлер, эреже катары, тиешелүү калктуу конуштун аймагында жашашы керектигин эске алуусу зарыл.
Керектүү документтердин үлгүлөрү: арыз, саясий партиянын протоколу, жарандардын чогулушунун протоколу
Сурап билүү телефону: (0312) 66-01-16
Эскертүү: “Кыргыз Республикасынын шайлоо жана референдум өткөрүү боюнча шайлоо комиссиялары жөнүндө” Кыргыз Республикасынын Мыйзамынын 19-беренесинин 2-бөлүгүнө ылайык, аймактык шайлоо комиссиясынын курамында ар бир саясий партиядан бирден ашык эмес өкүл болушу мүмкүн.
