Борбордук шайлоо комиссиясы Бишкек, Ош, Кара-Кулжа, Өзгөн, Кара-Суу, Базар-Коргон, Ноокен, Сузак, Токтогул, Майлуу-Суу, Жумгал, Айтматов, Манас, Панфилов, Аламүдүн, Чүй жана Ысык-Ата аймактык шайлоо комиссияларынын резервдерин толуктоо максатында жарандардан жана саясий партиялардан документтерди кабыл алууну жарыялайт.
Шайлоо комиссияларынын курамына жана резервине көрсөтүүчү субъекттер саясий партиялар жана жергиликтүү өз алдынча башкаруунун өкүлчүлүктүү органдары (жергиликтүү кеңештер) болуп саналат.
Белгилей кетсек, “Кыргыз Республикасында шайлоо жана референдум ѳткѳрүү боюнча шайлоо комиссиялары жѳнүндѳ” Кыргыз Республикасынын Мыйзамынын 22-беренесинин 1-бөлүгүнө ылайык шайлоо комиссиясынын мүчөлөрү төмөнкүлөр боло албайт:
- Жогорку Кеңештин депутаты, жергиликтүү кеңештин депутаты;
- мамлекеттик органдардын жана жергиликтүү өз алдынча башкаруу органдарынын кызмат адамдары;
- судья, укук коргоо жана фискалдык органдын кызматкери, аскер кызматчысы;
- талапкер, талапкердин жана саясый партиянын өкүлү;
- башка мамлекеттин жарандыгы бар адам;
- мыйзамда белгиленген тартипте, соттуулугу алып салынбаган же жоюлбаган адам;
- башка шайлоо комиссиясынын мүчөсү;
- терс негиздер боюнча шайлоо комиссиянын мүчөсүнүн милдеттеринен мөөнөтүнөн мурда бошотулган адам.
Аймактык шайлоо комиссияларынын резервине саясий партиялардан талапкерлерди кѳрсѳтүү алардын уставдарына ылайык жүзөгө ашырылат. Саясий партиялар талапкерлердин документтерин Борбордук шайлоо комиссиясына 2024-жылдын 26-июлунда саат 18:00гө чейин тапшырышат.
Аймактык шайлоо комиссияларынын резервине киргизүү үчүн жарандар, коомдук бирикмелер тиешелүү жергиликтүү кеңешке документтерди 2024-жылдын 26-июлунда саат 18.00гө чейин тапшырышы зарыл. Шайлоо комиссияларынын резервине талапкерлерди көрсөтүү боюнча жергиликтүү кеңештин сессиясы шайлоо комиссияларынын резервине талапкерлерди көрсөтүүнүн мөөнөтү аяктагандан кийин үч күндөн кечиктирбестен өткөрүлөт. Сессиянын чечими бардык талапкерлердин документтери менен бирге КР БШКга токтоосуз ѳткѳрүлүп берилет.
Ошондлой эле Борбордук шайлоо комиссиясы участкалык шайлоо комиссияларынын резервдерин толуктоо максатында аймактык шайлоо комиссиялары 2024-жылдын 26-июлунда саат 18.00гө чейин жарандардан жана саясий партиялардын аймактык бөлүмдөрүнөн документтерди кабыл аларын маалымдайт.
Участкалык шайлоо комиссияларынын резервине саясий партиялардын аймактык бөлүмдөрү талапкерлердин документтерин 2024-жылдын 26-июлунда саат 18.00гө чейин тиешелүү аймактык шайлоо комиссиясына беришет.
Участкалык шайлоо комиссияларынын резервине кирүү үчүн жарандар жана коомдук бирикмелер тиешелүү жергиликтүү кеңешке 2024-жылдын 26-июлунда саат 18.00гө чейин документтерди тапшырышы керек. Шайлоо комиссияларынын резервине талапкерлерди көрсөтүү боюнча жергиликтүү кеңештин сессиясы шайлоо комиссияларынын резервине талапкерлерди көрсөтүүнүн мөөнөтү аяктагандан кийин үч күндөн кечиктирбестен өткөрүлөт. Сессиянын чечими бардык талапкерлердин документтери менен бирге АШКга токтоосуз ѳткѳрүлүп берилет.
Шайлоо комиссияларынын резервине киргизүүгѳ берилүүчү документтердин тизмеси:
- талапкердин аймактык шайлоо комиссиясынын курамында иштөөгө макулдугу жөнүндө арызы жана Кыргыз Республикасынын шайлоо мыйзамдарынын нормаларын сактоо боюнча милдеттенмеси;
- паспорттун көчүрмөсү;
- иштеген, окуган жерин, билимин көрсөтүү менен ѳмүр баян жѳнүндѳ маалымат (кадрларды эсепке алуу баракчасы же резюме);
- байланыш маалыматтары: жашаган дареги, телефон номерлери;
- көрсөткѳн субъекттин протоколу.
Көрсөтүүчү субъекттер шайлоо комиссияларынын мүчөлүгүнө талапкерлер, эреже катары, тиешелүү калктуу конуштун аймагында жашоого тийиш экендигин эске алуусу зарыл.
Керектүү документтердин үлгүлөрү: арыз, саясий партиянын протоколу, жарандардын чогулушунун протоколу
Сурап билүү телефону: (0312) 66-01-16
