20-21-апрелде Жарандык билим берүү жана шайлоо технологиялары борбору (ЖБШТ) IDEA CA менен биргеликте ЕККУнун Бишкектеги Программалык кеңсесинин колдоосу менен жарандык билим берүүнүн алкагында орто мектептердеги кыздар үчүн мамлекеттик түзүлүштүн негиздери жана шайлоо процесстери боюнча эки күндүк тренинг өткөрүштү.
Иш-чарага Ысык-Ата районунун орто мектептеринен 31 окуучу катышты.
Тренингдин биринчи күнүндө адамдын жана жарандын укуктары, лидерлик сапаттар, ошондой эле жаштардын саясий процесстерге катышуусу жана Кыргыз Республикасынын мамлекеттик түзүлүшүн түшүнѳ билүү боюнча талкуулар болду.
IDEA CA аткаруучу директору А.Русланова катышуучуларды адам укуктарынын контекстинде аялдардын лидерлигинин негиздери менен тааныштырды, ошондой эле дебат технологияларына токтолду.
Экинчи күн толугу менен шайлоо маселелерине жана шайлоо процессине арналды. Машыктыруучу К.Мамытова учурдагы шайлоо системасы жана шайлоо процессинин өзгөчөлүктөрү тууралуу айтып берди.
Кыргыз Республикасынын Борбордук шайлоо комиссиясынын төрагасы Н.К. Шайлдабекова өз сөзүндө шайлоо процессинде кыздардын жана аялдардын ролу канчалык маанилүү экенин белгиледи. Колдонуудагы мыйзамдарда аялдарга жергиликтүү кеңештерге жана Жогорку Кеңешке депутат болууга мүмкүндүк берген атайын механизмдер бар. Аялдар түпкү табияты жана акыл-ойу жагынан сүйлөшүүлѳрдү жүргүзѳ билген жана ортодо тынчтыкты орното алчу болуп төрөлгөн. Аялдар ар дайым өз ара түшүнүшүүгө, тынчтыкка жана туруктуулукка жетишүүгө аракет кылып келет. Эгерде аялдар үй-бүлөдө жасаган мамиле мамлекеттик деңгээлге үлгү катары өтсө, өлкө өнүгөрү талашсыз. Төрага катышуучуларга ишенимдүү болууга, активдүүлүктү кѳрсѳтүүгѳ, изденүүчү жана турмуш жолундагы кыйынчылыктарды жеңе билүүчү болууга чакырды.
Чакырылган конок катары Кыргыз Республикасынын Жогорку Кеңешинин депутаты Э.Сурабалдиева сөз сүйлөдү тжана депутат айым болуу жолундагы тажрыйбасын айтып берди. Катышуучулар өздөрүн кызыктырган суроолорун берип, өз кезегинде парламентарий кыздарды активдүү болууга, жергиликтүү коомчулуктун, мамлекеттин өнүгүшүнө салым кошууга чакырды.
Окутуу программасы бай жана кызыктуу ѳттү. Катышуучуларга мамлекеттик бийлик системасы, адам жана жарандык укуктар тууралуу билимдерден тышкары, шайлоонун ачык-айкындуулугун жана ишенимдүүлүгүн камсыз кылган шайлоо технологияларынын иши көрсөтүлүп, добуш берүү жол-жоболорунун модели кѳрсѳтүлдү.
Катышуучуларга ойдон чыгарылган мамлекеттин шайлануучу кызмат орундарынын бирине өзүн көрсөтүү мүмкүнчүлүгү берилди. Талапкерлер Мамедова Гүлнара, Вахрушева Любовь, Нарынбекова Азема, Кахарова Диана шайлоо алдындагы программаларын даярдашып, үгүт иштерин жүргүзүштү. Шайлоонун жыйынтыгы боюнча Вахрушева Любовь бир добуш айырма менен жеңишке жетип, муну менен ал ар бир добуштун маанилүү экенин тастыктады.
Тренингдин эки күнү тең интерактивдүү форматта, түрдүү оюндар жана талкуулар менен өттү.
Тренингдин соңунда катышуучулар сертификаттарга ээ болушуп, эстелик сыйлыктар менен сыйланышты.
