2024-жылдын 21-февралында Кыргыз Республикасынын Шайлоо жана референдум өткөрүү боюнча борбордук комиссиясына (мындан ары - КР БШК) Муртазалиев Абдурахман Шамилевичтин ишеним каты боюнча ѳкүлү Токтакунова Таалайкүл Аскаралиевнадан арыз келип түшкөн.
Өзүнүн арызында жаран Т.А. Токтакунова төмөнкүлөрдү көрсөтөт.
КР БШК 2022-жылдын 9-мартындагы № 215 чечими менен Свердлов бир мандаттуу шайлоо округу боюнча Кыргыз Республикасынын Жогорку Кеңешинин депутаттыгына талапкер А.Муртазалиевди каттоо жокко чыгарылган. Бишкек шаарынын административдик сотунун 2022-жылдын 15-мартындагы чечими жана Кыргыз Республикасынын Жогорку сотунун 2022-жылдын 22-мартындагы токтому менен КР БШКнын 2022-жылдын 9-мартындагы № 215 токтомун мыйзамсыз деп таануу жана жокко чыгаруу жѳнүндѳ Кыргыз Республикасынын Жогорку Кеңешинин депутаттыгына талапкер А.Муртазатиевдин арызын канааттандыруудан баш тартылган.
Кыргыз Республикасынын Жогорку Кеңешинин депутаттыгына талапкер А.Муртазалиевди каттоону жокко чыгарууга жарандар Л. Смаиловага жана Ф. Талиповага А.Ш. Муртазалиевдин кызыкчылыгы үчүн добуштарды сатып алуу фактысы боюнча КР Кылмыш-жаза кодексинин 196-беренесинин 1-бөлүгүндѳ каралган кылмышты жасагандыгы үчүн айып тагылгандыгы тууралуу Бишкек шаардык ИИБ маалыматы негиз болгон.
КР БШКнын 2022-жылдын 9-мартындагы № 215 чечими менен укук коргоо органдары тарабынан берилген материалдардын негизинде КР Жогорку Кеңешинин депутаттыгына талапкер А.Ш. Муртазалиевди каттоо жокко чыгарылган.
Арыз ээси Бишкек шаарынын Свердлов райондук сотунун 2022-жылдын 16-майындагы өкүмүнө, анын кѳчүрмѳсүн ал 2024-жылдын 21-февралында алган, шилтеме жасап, анда айыпталуучу Л. Смаилова жана Ф. Талипова менен Ф.А.Муртазалиевдин жана/же анын жакын туугандарынын катыштыгы жок экендигин белгилейт.
Ушуга байланыштуу, арыз ээси бүгүнкү күндө КР БШКнын 2022-жылдын 9-мартындагы № 215 чечимди кабыл алууда негиздердин жоктугу белгилүү болгондугун жана аны жокко чыгаруу үчүн мыйзамдуу негиздер жаралды деп эсептейт. Өз кезегинде, 2022-жылдын 9-мартындагы № 215 токтом жокко чыгарылгандыгына байланыштуу КР БШКнын 2022-жылдын 25-мартындагы № 35 токтомунун 2 жана 3-пункттары жокко чыгарылууга жатат.
Арызда ошондой эле Свердлов райондук сотунун 2023-жылдын 21-декабрындагы өкүмү менен У.А.Мергеналиев жана А.О.Клименко дегендердин КР КЖК 196-беренесинин 2-бөлүгүндө каралган кылмышты жасагандыгы үчүн күнөөлүү деп табылгандыгы жана алардын КР ЖК депутаты Ш.К.Атазов менен тийиштиги бар экендиги далилдендиги кѳрсѳтүлгѳн.
Арыз ээси тѳмѳндѳгүлѳрдү ѳтүнгѳн:
1. Свердлов бир мандаттуу шайлоо округу боюнча Кыргыз Республикасынын Жогорку Кеңешинин депутаттыгына талапкер А.Ш. Муртазалиевди каттоону жокко чыгаруу жөнүндө КР БШКнын 2022-жылдын 9-мартындагы № 215 чечими жокко чыгаруу;
2. КР БШКнын 2022-жылдын 25-мартындагы № 35 токтомунун 2, 3-пункттары жокко чыгаруу;
3. Кыргыз Республикасынын Жогорку Кеңешинин депутаты Ш.К.Атазовдун ыйгарым укуктарын мөөнөтүнөн мурда токтотуу;
4. А.Ш. Муратазалиев №29 Свердлов бир мандаттуу шайлоо округу боюнча Кыргыз Республикасынын Жогорку Кеңешинин депутаты болуп шайланды деп таануу.
2024-жылдын 22-февралында КР БШК №5 чесимин кабыл алып, анда А.Ш.Муртазалиевдин арызы боюнча талаптарды канааттандыруудан баш тартылган.
КР БШКнын чечими менен макул эместигин билдирип, А.Ш. Муртазалиев Бишкек шаарынын административдик сотуна кайрылган.
2024-жылдын 1-мартында Бишкек шаарынын административдик соту төмөнкүдөй чечим чыгарган:
А.Ш.Муртазалиевдин арызы канааттандырылсын.
- А.Ш. Муртазалиевдин арызын канааттандыруудан баш тартуу жөнүндө КР БШКнын 22.02.2024-ж., №5 чечими анык эмес деп таанылсын.
- Свердлов бир мандаттуу шайлоо округу боюнча КР ЖК депутаттыгына талапкер А.Ш.Муртазалиевди каттоону жокко чыгаруу жѳнүндѳ БШКнын 9.03.2022-жылдагы №215 чечимин жокко чыгаруу, КР БШКнын 25.03.2022-жылдагы №35 токтомунун 2.3-пункттарын жокко чыгаруу КР БШКга милдеттендирилсин жана А.Ш. Муртазалиев №29 Свердлов бир мандаттуу шайлоо округу боюнча КР ЖКнын шайланган депутаты деп таанылсын.
Чечим 30 күндүн ичинде Бишкек шаардык сотуна апелляциялык тартипте даттанылышы мүмкүн.
.
