КР БШК 2023-жылдын 9-апрелине дайындалган Нарын, Баткен, Ош, Талас жана Чүй облустарынын айрым жергиликтүү кеңештеринин депутаттарын шайлоого шайлоочулардын алдын ала тизмесин жарыялады

Шайлоочулардын алдын ала тизмеси, Кыргыз Республикасынын Санариптик өнүктүрүү министрлигинин (калкты каттоо боюнча ыйгарым укуктуу мамлекеттик орган, мындан ары – КР СӨМ) маалыматтарынын негизинде түзүлүп, шайлоочулардын "Тизме" мамлекеттик порталына жайгаштырылды- https://tizme.gov.kg/view/public/tik_list_public_regional.xhtml.

2023-жылдын 8-февралына карата алдын ала тизмедеги шайлоочулардын саны - 71 696 шайлоочуну түздү, анын ичинен эркектер - 36 027, аялдар - 35 669 шайлоочу же тиешелүү түрдө 50,25% 49,75%.

Шайлоочулардын кагазга басылып чыгарылгын тизмелери 52 шайлоо участкасында 2023-жылдын 18-февралына чейин илинет.

Шайлоо мезгилинде шайлоочулардын тизмесин актуалдаштыруу жана тактоо күн сайын, шайлоочулардын кайрылуусу боюнча жана КР СӨМ менен өз ара байланышта жүргүзүлөт.

Урматтуу шайлоочулар!

2023-жылдын 18-февралынан тартып 24-мартына чейинки (кошуп алганда) мезгилде шайлоочулардын тизмесинен өзүңүз тууралуу маалыматты тактаңыз:

• 1255 же 119 номерине телефон чалуу менен;
• «tizme.gov.kg» сайтында;
• шайлоо участогунда;
• өзүңүздүн паспортуңуздагы идентификациялык жеке номерди (ПИН) көрсөтүү менен 119 номерине СМС жөнөтүп, Сиздин шайлоо участогуңуздун номери жана дареги тууралуу жооп аласыз (СМС билдирүү жөнөтүү жана чалуу акысыз).

Кандайдыр бир каталарды же так эместикти тапкан учурда, ошондой эле шайлоочулардын тизмесинде жок болсоңуз, 2023-жылдын 24-мартына чейин (кошуп алганда) Сиз паспортуңуздун көчүрмөсүн тиркеп, шайлоочулардын тизмесиндеги маалыматтарды тактоо жѳнүндѳ арыз менен тиешелүү участкалык шайлоо комиссиясына кайрылууга укуктуусуз. Мында шайлоочу биометрикалык идентификациядан өтөт.

Ошондой эле арызды электрондук форматта мыйзамдарда белгиленген тартипте авторлоштуруудан өтүп, "tizme.gov.kg" сайтында «Шайлоочунун кабинети» сервиси аркылуу тапшырса болот.

Биометрикалык каттоодон өтпөгөн жарандар Калкты тейлөө борборлорунан (КТБ – ЦОН) бул жол-жободон өтө алышат.

Маалымат үчүн: Кыргыз Республикасынын шайлоо мыйзамдарына ылайык-шайлоочулардын тизмесине добуш берүү күнү активдүү шайлоо укугуна ээ, жергиликтүү жамааттын мүчөсү болгон жана Кыргыз Республикасынын мыйзамдарына ылайык биометрикалык каттоодон өткөн Кыргыз Республикасынын баардык жарандары киргизилет. Шайлоочунун жергиликтүү жамаатка мүчөлүгү туруктуу жашаган жерин каттоо жөнүндө жарандын паспортундагы белги менен аныкталат.

(Кыргыз Республикасынын “Жергиликтүү кеңештердин депутаттарын шайлоо жөнүндө” мыйзамынын 2-бер. 41-абз.; 12-бер.1-бөл.)

Шайлоочулардын контролдук тизмеси 2023-жылдын 5-мартына чейин түзүлүп, «Тизме» мамлекеттик порталына жайгаштырылат, ал эми шайлоо участкаларында 2023-жылдын 10-мартына чейин илинет.

Шайлоочулардын биротоло тизмеси 2023-жылдын 30-мартына чейин түзүлүп, “Тизме” мамлекеттик порталына жайгаштырылат, ал эми шайлоо участкаларында 2023-жылдын 6-апрелине чейин илинет.