Бүгүн – Шайлоонун бүткүл дүйнөлүк күнү, ал 2005-жылы күзүндө Венгрияда шайлоо уюштуруучулардын Глобалдуу конференциясында уюшулган. Шайлоонун бүткүл дүйнөлүк күнү ар жылы февраль айынын биринчи бейшембисинде майрамдалат.
Шайлоону уюштуруу жана өткөрүү чөйрөсүндөгү кесипкөйлөр Шайлоонун бүткүл дүйнөлүк күнүн уюштуруу менен жарандардын шайлоо укуктарын камсыздоо жана сөздүн кеңири маанисинде шайлоо процесстерин өркүндөтүү проблемаларына адамадрдын көңүлүн буруу максатын көздөшкөн.
Шайлоо күнүн майрамдоо урматына Кыргызстан мүчөсү болуп саналган Европа өлкөлөрүнүн шайлоо уюштуруучуларынын ассоциациясы (ЕӨШУА) уюштурган Бүткүл дүйнөлүк саммити болуп өттү. Онлайн форматта жолугушуунун жүрүшүндө Жарандык билим берүү жана шайлоо технологиялары борборунун (ЖББ) директору М. Сарымсаков баяндама жасады. Ал саммиттин катышуучуларына 2021-жылы өткөрүлгөн шайлоо өнөктүктөрү, шайлоо мыйзамдарындагы акыркы өзгөрүүлөр, шайлоо натыйжаларынын аныктыгын жана айкындуулугун камсыздоодогу жетишкендиктер, мындан аркы өркүндөтүү боюнча милдеттер тууралуу маалымат беришти.
Мындан тышкары, шайлоо процессинде жетишкендиктер тууралуу маалымдоо, жаш шайлоочуларда демократиялык баалуулуктарга берилгендикти калыптандыруу максатында Борбордук шайлоо комиссиясы 3-февралда БШКнын өнүктүрүү боюнча туруктуу өнөктөштөрү ЕККУнун Бишкек шаарындагы Программалык кеңсесинин жана IFESтин, ошондой эле International Alert уюмунун көмөктөшүүсү менен мектеп окуучулары жана студенттер үчүн “Ачык эшиктер күнүн” өткөрдү. ()
ЖББ директору М. Сарымсаков менен Бишкек АШК мүчөсү О. Щербинина Бишкек шаарынын № 4 гимназиясында окуучулары үчүн “Мен – келечектеги шайлоочумун” деген темада ачык лекция өткөрүштү. Лекцияда Конституциянын жарандардын шайлоо укуктарын, демократиялык эркин шайлоолорду уюштуруунун негизги принциптерин жөнгө салган негизги жоболору ачылды.
Бишкек шаарынын № 4 гимназиясынын жогорку класстарынын окуучуларынын арасында “Жаштар жана шайлоо” деген темада сүрөт конкурсу жарыяланды. Курамына БШК өкүлдөрү У. Жылкыбаев, А. Жупуева, Б. Дюшенбиева кирген жюри 3 мыкты сүрөттү тандады. 9 «В» класстын окуучусу Черикова Карина (1-орун), 11 «Ж» класстан – Середа Валерия (2-орун), 9 «И» класстан – Лобова Анастасия (3-орун) жеңүүчү болушту. 11 «Ж» класстын окуучулары Ким Мин Джу, Патякин Максим, Фазылов Надим кызыктыруучу байгелерди алышты.
“Аралаш тутум. Кыргыз Республикасынын Жогорку Кеңешинин депутаттарын шайлоонун бул тутуму натыйжалуубу, ал элдин тандоосун чагылдырабы?” деген темадагы жаштар дебаттары күндүн чечүүчү окуясы болду. Жаштар дебаттары бирикмесинин “Бекитүү” жана “Тануу” командалары атаандаш болуп чыгышты. Жыйынтыгында “Бекитүү” командасы жеңүүчү болду жана команда мүчөлөрү Абдугулов Бектурган, Орозоев Бекназар эстелик байгелери менен сыйланышты. Экинчи команданын мүчөлөрү Орозбаев Бакытбек, Абыкеев Эрлан кызыктыруучу байгелерди татыктуу болушту.
Жаштар үчүн “Менин тандоом – менин укугум!” деген темада QUIZ-викторина дагы өткөрүлүп, 10 команда катышты. “Дайрект жооп беришти” командасы (1-орун), “Тамчы” командасы (2-орун), “Жаңы адамдар” командасы (3-орун) жеңип чыгып, байгелерди алышты.
Кыргыз Республикасынын Президентине караштуу Мамлекеттик башкаруу академиясынын өкүлү жана Бишкек шаарынын № 4 гимназиясынын окуучулары Кахут-оюндарынын жеңүүчүлөрү болушту.
Ошондой эле жаш меймандарга БШКнын имаратында экскурсия өткөрүлдү, анын жүрүшүндө алар аппараттын иши менен таанышып, өздөрүн кызыктырган суроолорго жооп алышты.
Шайлоонун бүткүл дүйнөлүк күнүн майрамдоо урматына, 2021-жылдын 28-ноябрында өткөн Кыргыз Республикасынын Жогорку Кеңешинин депутаттарын шайлоону өткөрүү алкагында маалыматтык, түшүндүрүү иштерине жигердүү катышкандыгы үчүн Кыргыз Республикасынын Президентине караштуу Мамлекеттик башкаруу академиясынын, И.К. Ахунбаев атындагы Кыргыз мамлекеттик медицина академиясынын, Кыргыз мамлекеттик юридикалык университетинин, К.Карасаев атындагы Бишкек гуманитардык университетинин, М.Рыскулбеков атындагы Кыргыз экономикалык университетинин студент ыктыярчыларына сыйлыктар тапшырылды. КР БШК кызматкерлери дагы сыйланды.
Демократиянын негизги принциптерин жана постулаттарын биздин өлкөнүн жарандарынын аң-сезимине жеткирүүдө шайлоолордун ролун ачып берүү, Конституция кепилдеген демократиялык эркиндиктерди жүзөгө ашыруу алкагында түздөн-түз же шайланган өкүлдөр аркылуу мамлекетти башкарууда жаш шайлоочулардын өз укуктарын жана мүмкүнчүлүктөрүн билүүсүнө жана түшүнүүсүнө көмөктөшүү бул иш-чаранын негизги милдети болуп саналат.
КР БШК аппаратынын маалымат бөлүмү
