Бишкекте жергиликтүү кеңештердин аял депутаттарына урмат
көрсөтүү аземи болуп өттү
Бүгүн – 15-июнда Бишкекте жергиликтүү кеңештердин жаңы
шайланган аял депутаттарын урмат көрсөтүүнүн адаттан тышкары тариздеги
аземи болуп өттү.
Бир нече саат бою бийликтин мамлекеттик органдарынын
өкүлдөрүнүн, экс-президент Розы Отунбаеванын, президенттин жубайы
Айгүл Жапарованын, Министрлер Кабинетинин төрагасынын орун басары
Жылдыз Бакашованын, БШК төрагасы Нуржан Шайлдабекованын жана эл
аралык уюмдардын өкүлдөрү менен айылдык кеңештердин аял
депутаттарынын ортосунда түз жана ачык диалог болду. Жергиликтүү
кеңештердин 40тан ашык аял өкүлү жергиликтүү кеңештердин
депутаттыгына ат салышууда кандай кыйынчылыктарга дуушар болгон
окуялары, ошондой эле жергиликтүү жамааттарды, аялдардын өлкөнүн
саясий турмушуна катышуусун өнүктүрүү боюнча пландары тууралуу
ойлорун бөлүштү.
БШК төрагасы Н. Шайлдабекованын айтуусу боюнча өткөн
жергиликтүү кеңештердин депутаттарын шайлоодо айылдык кеңештердин
деңгээлинде аялдардын квотасы толук даражада ишке ашырылды.
“Айылдык кеңештерде аялдардын саны 9%дан 38%га чейин көбөйдү.
Баары эле сыдыргыга салгандай болгон жок. Ар кандай стереотиптерге,
коомдун бул маселеге мамилесинен улам 65 округда аял талапкерлер
катышпады.
Ошону менен бирге 59 округда аял талапкерлердин саны квотадан
жогору болгону оң көрүнүш. Башкача айтканда, аялдар эркектерге атаандаш
болуп, а түгүл, эркектерге караганда көп добуш алып, кеңештерге келе
алышты. Натыйжада айылдык кеңештерде аялдардын саны көп эсе өсүүдө.
Эми аялдардын кеңештердин ишине катышуусун жигердүү,
натыйжалуу кылуу, алардын коомго катышуусу тамыр алышы үчүн алдыда
көп иштерди аткаруу зарыл. Албетте, биз айылдык кеңештерде аял
депутаттардын дагы, эркек депутаттардын дагы дараметин арттырышыбыз
керек. Жергиликтүү жамааттардын суроо-талаптарын натыйжалуу чече
алышы, жаратман иш жүргүзүшү үчүн жергиликтүү кеңештердин баардык
депутаттарын окутуу иш-чаралары өткөрүлөт.
БШК бул иштерди жарандык коом, эл аралык уюмдар менен
биргелешип, жигердүү жүргүзмөкчү. Өкмөт жалпысынан муниципалдык
башкаруу ишин өркүндөтүү зарылдыгы тууралуу билдирди”, - деп белгиледи
Н. Шайлдабекова.
Аялдардын укуктарын жана мүмкүнчүлүктөрүн илгерилетүү
жаатындагы Кыргызстандын улуттук жана эл аралык милдеттенмелерине
ылайык келген, өлкөнүн мыйзамдарындагы жана саясатындагы
жетишкендиктерди сактап калуу, атап айтканда, жергиликтүү жана Жогорку
кеңештердин депутаттарын шайлоо жөнүндө мыйзамдарда каралган бир
жыныстагы адамдар үчүн мандаттардын 30%ын резервге калтыруу жөнүндө
атайын чараларды колдонуу боюнча чараларды талкуулоо аял депутаттарга
урмат көрсөтүү аземиндеги интерактивдүү диалогдун маанилүү учуру болуп
калды.
Иш-чарага Жогорку Кеңештин депутаттарынын Аялдар форумунун,
БУУӨПтүн, БУУ-аялдар, ЕККУнун, ЕБдин, Швейцария Элчилигинин жана
бейөкмөт уюмдардын өкүлдөрү дагы катышты.
Ошондой эле “Мен лидер аялмын: Жаңы доорго секирик” аталыштагы
аял депутаттарга урмат көрсөтүү аземинин катышуучулары жана
меймандары үчүн Кыргызстандын түштүгүндөгү чек ара райондорунан
келген лидер аялдардын фотосүрөт жана картиналар көргөзмөсүнүн
ачылышы болду. Анда чагылдырылган окуялар жергиликтүү жамааттарда
билим берүү, саламаттыкты сактоо жана социалдык жактан өнүктүрүү
тармактарындагы ар түрдүү маселелерди чечүүдө аялдардын жалпы эл
таанылган салымдарынан тышкары, чыр-чатактарды жөнгө салууда жана
жамааттарды калыбына келтирүүдө аялдардын ролунун маанилүү экендигин
айгинеледи.
Аялдарга урмат көрсөтүү аземи “БУУ-аялдар” түзүмү менен
өнөктөштүктө Швейцария Өкмөтүнүн колдоосу алдында БУУӨПтүн
“Кыргызстандагы 2020–2021-жылдардагы шайлоолорду колдоо”
программасынын, ошондой эле Норвегия менен Швеция өкмөттөрү
каржылык жактан колдогон БУУнун “Айылдардагы аялдардын
экономикалык укуктарын жана мүмкүнчүлүктөрүн кеңейтүү” (JP RWEE)
биргелешкен программасынын алкагында өттү.
КР БШК аппаратынын маалыматбөлүмү
