Бүгүн, 2-сентябрда, Кыргыз Республикасынын Шайлоо жана референдум өткөрүү боюнча борбордук комиссиясы өзүнүн жыйынында 2020-жылдын 4-октябрына дайындалган Кыргыз Республикасынын Жогорку Кеңешинин депутаттарын шайлоодо эл аралык байкоочунун күбөлүгүнүн үлгүсүн бекитти.

Чечим “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамынын 10-беренесине, “Кыргыз Республикасынын шайлоо жана референдум өткөрүү боюнча комиссиялары жөнүндө” Мыйзамынын 7-беренесине, “Кыргыз Республикасынын шайлоо жана референдумундагы эл аралык (чет элдик) тартиби, статусу жана ыйгарым укуктары жөнүндө” Жобосунун 3-бөлүгүнүн 3.5-пунктуна ылайык 2016-жылдын 9-ноябрындагы № 197 токтому менен бекитилген (Кыргыз Республикасынын Шайлоо жана референдум өткөрүү боюнча комиссиясынын 2017-жылдын 4-октябрындагы № 493 токтомунун редакциясында) кабыл алынды.

Эл аралык байкоочу болуп, Кыргыз Республикасында шайлоого даярдык көрүүгө жана өткөрүүгө мыйзамдарда белгиленген тартипте байкоо жүргүзүү укугуна ээ, Кыргыз Республикасынын жараны болбогон чет өлкөлүк же эл аралык уюмдун өкүлү боло алат. Эл аралык байкоочулардын күбөлүгү анын статусун тастыктаган документи болуп эсептелет.

Күбөлүк 125х100 мм (эки тараптуу) стандарттуу түстөгү (жашыл) формага кыргыз жана орус тилдеринде түзүлүп, анын чоо-жайы үлгүдө келтирилген. Эң жогору жагында Кыргыз Республикасынын Жогорку Кеңешинин депутаттарын шайлоо тексти жазылган. Тексттин астында Кыргыз Республикасынын Жогорку Кеңешинин депутаттарын шайлоо күнү көрсөтүлгөн. Жогорку сол бурчунда Кыргыз Республикасынын герби жайгашкан.  Жогорку оң бурчунда Кыргыз Республикасынын  желеги жайгашкан.

Андан ары күбөлүктө анын номери, күбөлүктүн жарактуулук шарттары, бланктын ортосунда, КРнын БШКнын логотиби, андан кийин бланктын ортосунда: “Эл аралык байкоочу”, эл аралык байкоочунун фамилиясы, аты, атасынын аты, көрсөтүлгөн уюмдун аты, КРнын БШКнын төрагасынын колу, герби менен тегерек мөөр менен күбөлөндүрүлөт, бланктын аягында күбөлүктүн колдонуу мөөнөтү көрсөтүлөт.

КР БШК маалымат бөлүмү