КР БШК 2018-жылдын 21-майындагы №8-чечими менен Кызыл-Кыя аймактык шайлоо комиссиясынын 2018-жылдын 2-майындагы №4-чечимин жокко чыгарды.

2018-жылдын 27-апрелинде Кызыл-Кыя АШК №3-протоколу менен КСДП саясий партиясынан Кызыл-Кыя шаардык кеңешинин депутаты К.И.Турдумаматовдун өз арызынын негизинде ыйгарым укуктарын мөөнөтүнөн мурда токтотуу жөнүндө чечим кабыл алган.

2018-жылдын 2-майында Кызыл-Кыя АШК №4-протоколу менен Кызыл-Кыя шаардык кеңешинин депутатынын бош калган мандатын, “КСДП” саясий партиясынын 2018-жылдын 27-апрелиндеги сунуштамасынын негизинде, талапкерлердин тизмесинде 20-номерде турган талапкер К.И.Ниязовго өткөрүп берүү жөнүндө чечим кабыл алган.

Бул жерде АШК КСДП партиясынын талапкерлеринин тизмесинде  15-номерде турган Т.Алимбекова тизмедеги кезегин өзгөртүүгө макулдук берүү боюнча мурда жазылган арызын кайра чакыртып алгандыгын көңүлгө алган эмес.

Бул маселени изилдеп чыгуу үчүн БШКнын мүчөлөрүнөн жана БКШнын Аппаратынын кызматкерлеринен куралган Жумушчу топ түзүлгөн. Жумушчу топ АШК тарабынан чечим кабыл алууда мыйзам бузууларды аныктады.

2018-жылдын 15-майында КР БШКнын дарегине КСДП саясий партиясынан Кызыл-Кыя АШКга мурда жиберилген 2018-жылдын 27-апрелиндеги сунуштамасын кайра чакыртып алуу жана бош калган мандатты мыйзамдарга ылайык, тизмеде кийинки орунда турган талапкерге өткөрүп берүү жөнүндө кат келип түшкөн.

БШКнын чечиминде белгиленгендей, Кызыл-Кыя АШКсы КСДП саясий партиясынын 2018-жылдын 27-апрелиндеги сунуштамасын чакыртып алгандыгын эске алуу менен, шайлоо мыйзамдарына ылайык, талапкерлердин тизмесинде кийинки орунда турган талапкер Алимбекова Тахминага мандатты өткөрүп берүү жөнүндө чечим кабыл алууга тийиш.

КР БШКнын аппаратынын маалымат бөлүмү