Бүгүн, 2018-жылдын 12-майында, 2018-жылдын 13-майына дайындалган айрым жергиликтүү кеңештердин депутаттарын шайлоо боюнча добуш берүүчү жайдан тышкары жерде добуш берүү жүргүзүлдү.
Кыргыз Республикасындагы жергиликтүү кеңештеринин депутаттарынын ыйгарым укуктарынын мөөнөтү аяктагандыгына байланыштуу, Кыргыз Республикасынын Президентинин 2018-жылдын 12-мартындагы №55 Жарлыгы менен, Кыргыз Республикасынын Жалал-Абад облусунун Көк-Арт айылдык кеӊешине, Токтогул районунун Токтогул шаардык кеӊешине, Нарын облусунун Ат-Башы районунун Казыбек айылдык кеӊешине, Ош облусунун Кара-Суу районунун Төлөйкөн айылдык кеӊешине депутаттарды шайлоо 2018-жылдын 13-майына, жекшембиге дайындалган.
Кыргыз Республикасынын Президентинин 2018-жылдын 29-мартындагы ПЖ №63 Жарлыгына ылайык, Жалал-Абад облусунун Аксы районунун Кара-Жыгач айылдык кеңешинин, Чүй облусунун Сокулук районунун Сокулук айылдык кеңешинин депутаттарын мөөнөтүнөн мурда шайлоо 2018-жылдын 13-майына дайындалган.
“Жергиликтүү кеңештердин депутаттарын шайлоо жөнүндө” Кыргыз Республикасынын Мыйзамынын 33-беренесине ылайык, добуш берүү үчүн жайдан тышкары жерде добуш берүү  шайлоо күнүнө чейин бир календарлык күн калганда гана жана шайлоочунун добуш берүү үчүн жайдан тышкары жерде берүү мүмкүнчүлүгүн түзүү жөнүндө жазуу жүзүндө кайрылуусунун негизинде гана жүргүзүлөт. 
Добуш берүүчү жайдан тышкары жерде добуш берүү боюнча бардыгы болуп 456 шайлоочудан арыз түшкөн болсо, анын ичинен 385 шайлоочу добуш берди. 71 шайлоочу добуш берүүчү жайдан тышкары жерде добуш бере алган жок. Анын ичинен 17 шайлоочунун паспорту жок, 22 шайлоочу үйдө болбогондугуна байланыштуу, 7 шайлоочу шайлоочулардын тизмесинен чыккан эмес, 1 шайлоочу идентификациядан өтпөгөндүктөн, 24 шайлоочу башка себептер менен добуш бере алышкан жок.

КР БШКнын аппаратынын маалымат бөлүмү