Участкалык шайлоо комиссиялары добуштарды кол менен саноонун  натыйжасы боюнча добуш берүүнүн  жыйынтыгын    аныкташууда.  

УШКнын жыйынтыктоочу жыйналышында  добуш берүүнүн жыйынтыгы жөнүндө  протокол түзүлүп, УШКнын бардык катышып отурган мүчөлөрү кол коюшат, добуш берүүнүн жыйынтыгы жөнүндө протоколдун мөөр басылган көчүрмөсу бардык катышкандарга берилет.

Ошону менен бирге УШКнын жыйынтыктоочу жыйналышында  добуш берүүнүн жүрүшүндө келип түшкөн арыз, даттануулар милдеттүү түрдө каралат.

УШК протоколдорунун негизинде аймактык шайлоо комиссиялары өздөрүнүн жыйналышында  Президенттик шайлоодогу добуш берүүнүн жыйынтыгын чыгарышат.

Тиешелүү аймактагы шайлоонун жыйынтыктары тууралуу  протоколго кол коюунун алдында, аймактык шайлоо комиссиясы милдеттүү түрдө жыйынтыктоочу жыйналышын өткөрөт, анда комиссияга келип түшкөн добуш берүүнү өткөрүүгө, добуштарды саноого жана участкалык шайлоо комиссияларынын протоколдорун түзүүгө байланыштуу  арыздар (даттануулар) каралат.

Добуш берүүнүн жыйынтыктары жөнүндө протокол жана бардык шайлоо документтери токтоосуз түрдө Борбордук шайлоо комиссиясына берилет.

Шайлоонун натыйжаларын БШК шайлоо күнүнөн кийин 20 күндүк мөөнөттөн кечиктирбестен аныктайт.

БШК шайлоонун натыйжалары жөнүндө  протокол түзөт, ага алардын негизинде шайлоонун натыйжалары  аныкталуучу, түздөн түз төмөн турган шайлоо комиссияларынын саны жөнүндө маалыматтар, ошондой эле төмөн турган шайлоо комиссияларынын протоколдорунун жалпы кошунду маалыматтары боюнча жыйынды таблица, келип түшкөн протоколдорунун маалыматтары киргизилет.

Добуш берүүгө катышкан бардык шайлоочулардын жарымынан көп добушун алган талапкер Кыргыз Республикасынын Президентинин кызмат ордуна шайланды деп эсептелет.

КР БШК аппаратынын маалыматтык бөлүмү