2017-жылдын 20-22-сентябрында Москвада “Көп полярдуу дүйнөнүн шартында бүгүнкү күндүн шайлоо тенденциясы” аттуу эл аралык конференция болуп өттү. Ага Россиянын Борбордук шайлоо комиссиясынын төрагасы Э.Панфилова жана Кыргыз Республикасынын Борбордук шайлоо комиссиясынын төрагасы Н.Шайлдабекова катышты.
Конференциянын максаты өнүгүп жаткан көп полярдуу дүйнөнүн шартында бүгүнкү күндөгү шайлоо тенденциясы учурунда жогорку деңгээлде өз ара пикир алышуу жана шайлоону уюштурууда улуттук практиканы, эл аралык-укуктук актуалдуу маселелерди талкуулоо болуп саналат.
Россия Федерациясынын Борбордук шайлоо комиссиясы уюштурган конференциянын ишине КМШ Аткаруу Катчысынын-Аткаруу Комитетинин төрагасынын биринчи орун басары В.Гуминский, ШКУнун Башкы катчысынын орун басары К.Ван, Филипин Республикасынын Шайлоо боюнча комиссиясынын мүчөсү А.А.Парреньо, Азият шайлоо органдар Ассоциациясынын атынан, Россия Федерациясынын коомдук палатасынын катчысынын орун басары С.Орджоникидзе, Федерация Советинин эл аралык иштер боюнча комитетинин төрагасынын орун басары А.Климов, Кыргызстан, Азербайджан, Армения, Беларусь, Казакстан, Таджикстан, Өзбекстан, Индия, Пакистан жана башка республикалардын шайлоо комиссияларынын башчылары, ошондой эле КМШ мамлекеттер-катышуучуларынын Парламенттер аралык Ассамблея Советинин, БУУнун Москвадагы маалыматтык борборунун жана башка эл аралык уюмдардын өкүлдөрү катышты.
Конференцияда сөз сүйлөгөн КР Борбордук шайлоо комиссиясынын төрагасы Н.Шайлдабекова, акыркы эки жылда Кыргыз Республикасындагы шайлоо системасында реформа жүрүп, жаңы шайлоо модели-маалыматтык шайлоо системасы (МШС) киргизилип, 2016-жылдагы референдумда, 2017-жылдагы май айындагы жергиликтүү кеңештердин депутаттарын шайлоодо сыноодон ийгиликтүү өткөндүгүн белгиледи.
Кыргызстанда калктын бирдиктүү реестри түзүлгөн, жарандар биометрикалык маалыматтары боюнча өздүгүн аныктаган документтерди алышат. БШК менен МКК, эки мамлекеттик органдын биргелешип кызматташуусунун негизинде шайлоо системасына толук жана сапаттуу реформа жүргүзүүгө мүмкүн болду. Азыркы учурда автоматтык саноо урнасынын операторлорунун, техникалык колдоо тобунун, МКК операторлорунун иши жакшырды, шайлоо комиссиясында кабыл алынган чечимдердин ачыктыгы жакшырды. Шайлоочуларды биометрикалык маалыматтар боюнча идентификациядан өткөрүү жана автоматтык саноо урнасынын ишинен кийин добуштарды саноо учурунда максималдуу ишенимдүүлүккө жетишилди. Бул ар бир жарандын добушун эске алууга, конституциялык мыйзамды жана пассивдүү укукту натыйжалуу ишке ашырууга негиз түздү-деди өз сөзүндө КР БШКнын төрагасы.
«Бүгүнкү күндө КР БШК 15-октябрда өтө турган Кыргыз Республикасынын Президентин шайлоого эл аралык мониторинг жүргүзүү ишин камсыз кылуу боюнча иш жүрүүдө. Ошондой эле 20-сентябрдагы маалыматтар боюнча дүйнөнүн 38 мамлекетинен эл аралык 203 байкоочу аккредитациядан өттү. КР БШК эл аралык байкоочуларга, Кыргызстандагы жооптуу Миссияларын ишке ашырууга ар тараптуу жардам берүүгө даяр,”-деп белгиледи Н.Шайлдабекова.
Кыргызстандагы шайлоону өткөрүүгө даярдык көрүү процессине кызыгуу менен байкоо жүргүзүү, КР БШК шайлоонун жыйынтыгын акыйкат, таза жана ишенимдүү чыгарууда биометрикалык технологияны колдонуу, шайлоочуларды идентификациялоо жана добуштарды автоматтык саноо урнасын пайдалануу менен жаңы шайлоо технологиясын ийгиликтүү турмушка ашышына байланыштуу болду.
КР БШК аппаратынын маалыматтык бөлүмү
