19-декабрда БШКга Б. Макенбаевадан Кыргыз Республикасынын референдумун өткөрүү учурунда Искра айылындагы шайлоо участогунда добуш берүүнүн натыйжалары боюнча даттануу арызы түштү.

Б. Макенбаевадаттануу арызында Чүй облусунун Искра айылындагы психоневрологиялык түнөк жайында референдум алдында “тил алчаак”тургундарды паспорттоштуруу өткөрүлгөнүн белгилеген. Бирок бул маалымат далилдер менен ырасталган эмес.

Арыз ээси даттануу арызында аталган түнөк жайда“макул” жана “каршы”үгүт жүргүзүлгөнбү же жокпу деп суроо койгон.

Ушундай жүйөөлөрдүн негизинде Б. Макенбаева БШКдан түнөк жайдын тургундары катышканшайлоо участогунда добуш берүүнүн натыйжаларынжокко чыгарууну өтүнгөн.

БШК 2016-жылдын 17-ноябрында “Кыргыз Республикасынын шайлоолорун жаан референдумдарын өткөрүүдө айрым категориялардагы жарандардын шайлоо укуктарын камсыз кылуу жөнүндө” №216 токтому менен Жобону бекитип,  бул документти зарыл чараларды көрүү үчүн тиешелүү мекемелерге жөнөткөн.

Ошону менен бирге Борборшайком Кыргыз Республикасынын мыйзамдарына ылайык БШК үгүт жүргүзүүүчүн шайлоо процессинин бардык катышуучуларына тең шарт түзөрүн, бирок үгүт жүргүзүүгө ыйгарым укугу жок экенин белгиледи.

БШК 2016-жылдын 21-декабрдагы жыйынында Б. Макенбаеванын даттануусун канааттандыруудан баш тартуу тууралуу чечим кабыл алды. Ошол эле учурда кээ бир категориядагы жарандардын шайлоо укуктарын жүзөгө ашыруу боюнча талдоо жүргүзүп, мындан аркы чараларды иштеп чыгуу үчүн даттануу арызы БШКнын шайлоо процессин талдоо жана өркүндөтүү боюнча жумушчу тобуна жөнөтүлдү. Ал эми Б. Макенбаевага бул маселелер боюнча өз ара аракеттешүү сунушталды.

КР БШК басма сөз кызматы