Кыргыз Республикасынын Президентинин 2024-жылдын 4-мартындагы Жарлыгына ылайык, №2 Баткен бир мандаттуу жана №9 Кара-Суу бир мандаттуу шайлоо округдары боюнча Кыргыз Республикасынын Жогорку Кеңешинин депутаттарын мөөнөтүнөн мурда шайлоо дайындалды.

“Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын Конституциялык Мыйзамынын 59-беренесинин 7-бөлүгүнө ылайык: “Бир мандаттуу Кыргыз Республикасынын Жогорку Кеңешинин депутаттарын шайлоо. Тиешелүү шайлоо округдарынан чыгып кеткендердин ордуна шайлоо округдары Кыргыз Республикасынын Президенти тарабынан дайындалат жана ушул конституциялык Мыйзамда белгиленген тартипте бош депутаттык мандат пайда болгондон кийин эки айдын ичинде Борбордук шайлоо комиссиясы тарабынан өткөрүлөт.».

Кыргыз Республикасынын Президентинин Жарлыгы менен №2 Баткен бир мандаттуу шайлоо округу жана №9 Кара-Суу бир мандаттуу шайлоо округу боюнча Кыргыз Республикасынын Жогорку Кеңешинин депутаттарын мөөнөтүнөн мурда шайлоо жекшембиге, 2024-жылдын 28-апрелине дайындалды.

Жогоруда аталган конституциялык Мыйзамдын 59-беренесине ылайык, мөөнөтүнөн мурда шайлоолордо конституциялык мыйзамда белгиленген шайлоо аракеттеринин мөөнөттөрү үчтөн бирине кыскартылат.

Кыргыз Республикасынын Жогорку Кеңешинин депутаттарын мөөнөтүнөн мурда шайлоону даярдоо жана өткөрүү үчүн жогоруда көрсөтүлгөн бир мандаттуу шайлоо округдары боюнча бир округдук шайлоо комиссиясы түзүлдү. Добуш берүү үчүн 143 шайлоо участкасы ачык болот: Кара-Суу районунда - 62, Баткен районунда - 81.

Маалымат үчүн:

Жеке арыздардын негизинде, Кыргыз Республикасынын Борбордук шайлоо комиссиясынын 2024-жылдын 22-февралындагы токтому менен №9 Кара-Суу бир мандаттуу шайлоо округу боюнча Кыргыз Республикасынын Жогорку Кеңешинин депутаттары И.И.Матраимовдун жана №2 Баткен бир мандаттуу шайлоо округу боюнча Н.А.Ражабалиевдин депутаттык ыйгарым укуктары мөөнөтүнөн мурда токтотулду.

КР БШК маалымат бөлүмү