2024-жылдын 27-апрелинде Шайлоо жана референдум өткөрүү боюнча борбордук комиссиясынын жыйынында  №2 Баткен, №9 Кара-Суу жана №7 Ош  шайлоо округдарында Жогорку Кеңештин депутаттарын мөөнөтүнөн мурда шайлоону даярдоо жана өткөрүү учурунда  ыкчам чара кѳрүүнүн  координациялык тобунун маалыматы каралды.

            Жыйынга Кыргыз Республикасынын Ички иштер министрлигинин төмөнкү өкүлдөрү: Кыргыз Республикасынын ИИМдин Тергөө кызматынын бөлүм башчысы Макилов Султан Бейшенбекович, анын орун басары Эшимкан уулу Нурдин,   Баткен областынын ички иштер башкармалыгынын начальниги Кундузов Болот Акылбекович, анын орун басары Ниязбеков Равиль Керимович, Ош ОИИБнын тергөө кызматынын башчысы Тургуналиев Канат Аскарбекович, анын орун басары Нуралиев Тынчтыкбек Кадырович, Кара-Суу районунун ИИБдин башчысынын орун басары Мусаев Максат Абдыкаимович катышты.

                Кыргыз Республикасынын Башкы прокуратурасынан: Баткен облусунун прокурору Касымбеков Таалайбек Макенович, Кадамжай районунун прокурору Имангазиев Араз Узакович, Баткен районунун  прокурору Курманакунов Нурбек Абдыкадырович, Баткен райондук  прокуратурасынын бөлүм башчысы Бапов Салимбек Сайдакматович, Ош шаарынын прокурорунун орун басары Кубатидинов Абдирашит Кубатидинович, Ош шаардык прокуратурасынын бөлүм башчысы Насипов Канат Жумалиевич, Ош облусунун прокурорунун орун басары Сегизбаев Адмаз Ташмаматович, Кара-Суу районунун прокурору Урдалетова Эркингүл Бурганаковна, Кара-Суу районунун прокурорунун орун басары Чыбышев Сыргак Токтобекович катышты.

                Округдук шайлоо комиссияларынан: Баткен ОШКнын төрагасы Айтпаев Бахабидин Ташболтович, Ош   ОШКнын төрагасы Бердибекова Кулипа, Кара-Суу ОШКнын төрагасы Кимсанов Каныбек Кимсанович келишкен.

         Үч округда шайлоону даярдоонун жүрүшүндѳ шайлоо мыйзамдарын бузуулардын саны жѳнүндѳ Кыргыз Республикасынын Ички иштер министрлигинин Тергөө кызматынын башчысынын орун басары Эшимкан уулу Нурдиндин маалыматы угулду.

           198 шайлоо участкасында  коомдук тартипти жана коопсуздукту камсыздоого 800дөн ашык милиция кызматкерлери тартылганы белгиленди.

                27-апрелге карата шайлоо мыйзамдарын бузуу боюнча 19 материал катталган:

         - №2 Баткен шайлоо округу боюнча 5 билдирүү;

         - №7 Ош шайлоо округу боюнча 10 билдирүү;

         - №9 Кара-Суу шайлоо округу боюнча 4 билдирүү;

         Келип түшкөн материалдардын жыйынтыгы боюнча чаралар көрүлдү. Бир факты боюнча иликтөө иштери жүрүп жатат.

         № 2 Баткен шайлоо округу;

         Баткен облусунун ички иштер башкармалыгынын башчысынын орун басары Р.К. Ниязбеков 3 материал боюнча процессуалдык чечим кабыл алынганын, Баткен ОИИБ ​​тарабынан 2 материал протоколго алынып, алар боюнча да  чечим  кабыл алынганын билдирди.

         Баткен облусунун прокурору Т.М.Касымбековдун маалыматы угулду. Прокуратура тергөө органдары тарабынан кабыл алынган бардык 5 чечимдин мыйзамдуулугу жана негиздүүлүгү текшерилип, шайлоонун мыйзамдуулугун камсыз кылуу боюнча да көзөмөл жүргүзүп жатканын билдирди.

         Баткен ОШКнын төрагасы Б.Т Айтбаев депутаттыкка талапкер З.Ы. Кожоновго 2024-жылдын 27-апрелиндеги № 4 токтому менен “шайлоо үгүт иштерин жүргүзүү шарттарын бузгандыгы үчүн” КР Укук бузуулар кодексинин  65-беренесине  ылайык 7500 сом өлчөмүндө айып салынганын билдирди.

         Кыргыз Республикасынын Жогорку Кеңешинин депутаттыгына талапкер М.Г.  Ойтемиров боюнча  Баткен ОШКнын 2024-жылдын 27-апрелиндеги №5 токтому менен Кадамжай райондук ички иштер бөлүмүнүн материалдары эске алган.

         № 9 Кара-Суу шайлоо округу:

         Кара-Суу райондук ички иштер бөлүмүнүн башчысынын орун басары М.А. Мусаев округда  мыйзам бузуулар боюнча 4 материал катталганын билдирди.

         Текшерүүнүн жыйынтыгы менен бардык  4 билдирүү боюнча кылмыш ишин козгоодон баш тартуу чечими чыгарылган. 3 материал Кара-Суу ОШКынын  кароосуна  жөнөтүлгѳн.

         Кара-Суу районунун прокурору Э.Б. Урдалетова прокуратура тарабынан 1 материалдын мыйзамдуулугу жана негиздүүлүгү текшерилгенин билдирди. Калган материалдар боюнча тергѳѳ аракеттерине кѳзѳмѳл  жүргүзүлүүдө.

                № 7 Ош шайлоо округу:

         Ош шаардык ички иштер башкармалыгынын тергөө кызматынын башчысы К.А. Тургуналиев №7 Ош шайлоо округундагы мыйзам бузуулар тууралуу маалымат берди. Мыйзам бузуулар боюнча 14 материал катталган:

11 материалдын негизинде кылмыштын курамы жок болгондуктан кылмыш ишин козгоодон баш тартуу чечими кабыл алынган. Анын ичинен 2 материал Ош ОШКнын кароосуна жана тиешелүү чара көрүү үчүн жиберилген. Анын негизинде Борбордук шайлоо комиссиясы талапкер М.Маматкуловду каттоону жокко чыгарган. Калган  3 материал боюнча текшерүү жүрүп жатат.

       Ош шаарынын прокурорунун орун басары А.К. Кубатидинов   Ош шаардык ички иштер башкармалыгы тарабынан кабыл алынган 14 чечимдин мыйзамдуулугу жана негиздүүлүгү прокуратура тарабынан текшерилип, анын 10 чечими прокуратура тарабынан мыйзамдуу жана негиздүү деп табылгандыгын билдирди. Прокуратура өзү 1 мыйзам бузуу фактысын каттаган – бул журналист Ыдырыс Исаковдун талапкер Б.Эргешов боюнча материалы. Бул материал КР Борбордук шайлоо комиссиясында каралган. Прокуратура кылмыш ишин козгоодон баш тартты. Ошону менен бирге Ош шаарынын мэриясынын жана анын муниципалдык бөлүмдөрүнүн айрым кызматкерлеринин тартиптик жоопкерчилигине прокурордук чара көрүү актысы түзүлдү.

                Мыйзамдын талаптарын сактоо жана жарандардын шайлоо укуктарын коргоо максатында БШК ЫЧКТ мыйзамда каралган жоопкерчиликтин зарыл чараларын кѳрүп, кабыл алынган  чаралар жөнүндө маалымдайт.